Sámi dáidda beaggá – hálddahusa hástalus

Iluin vásihit ahte sámi dáidda beaggá sihke riikka siskkobealde ja riikkaidgaskasaččat. Sámi dáiddárfierpmádahkan leat mii dán geažil ollu jagiid ožžon ollu jearaldagaid sihke guhkkin ja lahka, min unna ja barggánis hálddahusažii.

Hálddahus lei álgobáliid ásahuvvon ovddidit sámi dáiddárkollektiivva ja láhčit dasa dili. Movt galggaimet dasto juohkit resurssaid go eanebut ahte eanebut háliidedje oasáža min hálddahusas? Lei go riekta bidjat nu ollu min dáiddárguimmiid resurssain olggobeallái?

Buori šiehtadusas leat dušše vuoitit 

Dáiddadálus beroštit mii olmmošlaš ceavzilvuođas. Galgá leat vuoiggalaš ja dearvvašlaš dássedeaddu buohkaid bargodilis, ja resurssaid galgá atnit vuoiggalaččat ja guoddevaččat. Čoavddus šattai ahte mii čohkkiimet buot dábáleamos jearaldagaid ja hábmiimet bálvalusaid daid vuođul. Dasa lassin fállat heivehuvvon bálvalusaid šiehtadusaid vuođul.

Daid bálvalusaid fállat čielga haddemodeallaid main leat duohta golut mat gokčet sihke dáiddárguimmiid ja hálddahusa goluid, lassin unna oasážii mii manná min erenoamáš sámi dáiddárkollektiivii. Dat mearkkaša ahte juohke háve go don anát Dáiddadálu bálvalusaid de leat fárus addime sámi dáiddáriidda vuoiggalaš bálkká ja seammás doarjjut min barggu sámi dáiddáriid ovddas, vai mii sáhttit leat mielde ovdánahttime sámi dáidaga ja daiguin joksat vel eanebuid. Dá lea dilli mas buohkat vuitet, sihke dáiddárfierpmádat, hálddahus, mii sáhttá bálkáhit vel eanet bargiid go lea dárbu, ja berošteaddjit ja kundarat geat atnet ávkki bálvalusain.

Ideála fierpmádat

Dáiddadállu lea ideála oasusfitnodat man badjebáza manná sámi dáiddárfierpmádaga ulbmiliidda.

Loga eanet min bálvalusaid birra dás.

Leat go dus jurdagat ovttasbargui dahje háliidat go suokkardit minguin ideaid? Váldde oktavuođa hálddahusain!