Dáiddadálu birra
Dáiddadállu lea ásaheami rájes 2014:s šaddan guovddášsadjin Sámi dálááiggedáidaga ja báikkálaš, guvllolaš, sisriikkalaš ja riikkaidgaskasaš fágabirrasiid ja álbmoga gaskkas.
Oanehis áiggis lea Dáiddadállu šaddan ásahussan gos dáiddárat ieža ja kollektiiva obbalaččat sáhttá čájehit buriid bohtosiidda. Dáiddadállu lea hábmen erenomáš fágarasttildeaddji dáiddabirrasa mas lea alla kvaliteahtta, gos sámi kultuvra, jurddašeapmi ja filosofiija leat vuođđun kontemporára sámi dálááiggedáidagii. Dáiddadállu ovddasta dáiddavugiid nugo visuála dáidaga, filmma, dánsuma, teáhtera, koreografiija, TV-buvttadeami, lávdedáidaga, designa, girječállima, musihka ja juoigama.
Filmmaš Dáiddadálu birra. Geahča movt Dáiddadállu álggahuvvui. Filmma lea buvttadan: Forest People AS.
Govvejeaddji: Per Heimly
Guovdageaidnu. Govvejeaddji: Per Heimly
Dáiddadállu lea ja galgá bissut geasuheaddji birasin mii veahkeha sámi dáiddáriid lihkostuvvat – sihke dáiddalaččat ja sosiálalaččat. Dáiddadálus lea dáiddafága vuođus ja min ovttasbarggu ja fitnodatfágalaš lonohallama bokte aktevrraiguin ealáhusovdáneami siskkobealde, nugo Innovasjon Norge, Ovddos, Hermetikken ja Sápmi kulturnæringshage, bargat mii maiddái nannet ovttaskas fitnodagaid ja gánnáhahttivuođa. 2014-2020 áigodagas stuorui Dáiddadállu 5 miellahtus 19 miellahttui. Jagis 2020 rievdadeimmet miellahttuvuođa dáiddarguoibmevuohtan ja gártadeimmet 21 dáiddárguoimmi. Maŋemus jagi leat bargan garrasit struktureret fitnodatplána ja funkšuvnnaid, ja danin rahpasa Dáiddadállu 2024:s miellahtuide miehtá Sámi.
Bargat ovddidit ja čalmmustahttit Sámi dáidagiid ja dáiddáriid. Min vuođđu ja vuolggasadji lea Sámis. Orrut, bargat ja ovdánit vuođđoprinsihpain ahte min bargu lea fárus ovdánahttime ja áimmahuššame dearvvaš ja ealli Sámi. Dat mielddisbuktá ahte mii bargat mihtuiguin joksat vuoiggalašvuođa, bistevaš ja guoddevaš ovdáneami min ásahusa bokte ja buot doaimmaideamet bokte. Vuoiggalašvuođa, dearvvašvuođa ja orohahttivuođa, bistevašvuođa ja ceavzilvuohta mii gusto sihke olbmuide, elliide, lundui, gillii, kultuvrii ja ealáhusaide min servvodagas. Mii vuhtiiváldit ahte árbevirolaš sámi eallinvuogi ja máilmmigova lunddolaš vuođđun lea guoddevaš jurddašeapmi, ja danin leat sámi árvvut lunddolaš vuolggasadjin ja vuođđun maiddái min ásahussii ja min doaimmaide.
Anna Katri Helander. Govvejeaddji: Ørjan Marakatt Bertelsen
Gutted - Gávogálši, 2022, Máret Ánne Sara dáidda.
Human Habitat. Govven: Ken Are Bongo
Sámi biras, sámi servvodat ja álbmot leat unnitlogus ja dávjá garra deattu vuolde olggobealde beroštumiid geažil. Sámi politihkalaš fápmu lea sakka ráddjejuvvon. Boađusin das lea ahte dáiddárat dávjá barget lossa ja váttis fáttáiguin, ulbmiliin čalmmustahttit ja hástalit status quo.
Háliidit láhčit dili gievrras dáiddáriidda, ja rabas ja oadjebas birrasa sámi dáiddáriidda, vai sii nákcejit rájiid sirdit. Olmmošlašvuohta ja gulahallan leat guovddáš árvvut Dáiddadálus. Gulahallan gusto visot eallimii, sihke fysihkalaš ja vuoiŋŋalaš ipmárdusas.
Administrasjon:
- Dine Arnannguaq Fenger Lynge
- Iŋgá Elisa Påve Idivuoma
- Ánne Kátjá Gaup
Dine Arnannguaq Fenger Lynge
Beaivválaš jođiheaddji dine@daiddadallu.com +4746920280
Iŋgá Elisa Påve Idivuoma
Prošeaktabargi Inga.elisa@daiddadallu.com +46702620053
Ánne Kátjá Gaup
Media ja gulahallanbargi Anne.katja@daiddadallu.com
