Ráhkkaneame dehálaš čájáhussii
Min dáiddárguoibmi Ánne Kátjá Gaup lea dán áigge ráhkkaneame boahtte jagi Davvi Norgga riemuide, mat lágiduvvojit Háršttáin.
Boazu lea dat ealli man Ánne Kátjá ráhkista govvet.
Govva: Ánne Kátjá Gaup
Son lea válljejuvvon festivála nuorra dáiddárin, ovttas musihkkariin Bendik Vaaja Aspaasiin. Válljejupmái gullá 170.000 ruvdnosaš bargostipeanda, ja su barggut šaddet dasto oassin čájáhusas Davvi Norgga riemuin 2027, Háršttáin.
Dás logat eanet dán guovtti dáiddára birra: UngKunst 2027
Ieš ii sáhte Ánne Kátjá vel muitalit nu ollu juste fal sisdoalu birra, muhto son dadjá ahte lea fysalaš govvačájáhus mas fáddán lea boazodoallu ja dat olbmot geat barget doppe.
– Dát prošeakta lea hui dehálaš, go mu mielas dat lea stuoris oažžut luohttevašvuođa festivála bealis. Sin ráđđeaddit ja buvttadeaddjit leat hárjánan olbmot geat sihke bagadallet ja veahkehit mu ráhkkanit čájáhussii, ja dat dovdo munnje hui oadjebassan, dadjá son.
Olbmuid maiddái liiko govvet. Dá leaba guokte máná olgun murjjiid borrame.
Govva: Ánne Kátjá Gaup
- Ánne Kátjás lei vuosttaš čájáhus 17 jahkásažžan, «Boazodoallu – min eallin».
- 2020:s álggahii iežas fitnodaga Johtti productions, 23 jahkásažžan!
- 2022:s ilmmai su oanehisfilbma «Buot iežan bohccuid dovddan» mii lea su áhku Gáren Ánná birra.
- 2025:s rahppui bissovaš čájáhus «Our Wondrous Planet» Melbournes, Australias. Doppe čájehit sihke su filmmaid ja govaid čájáhusas mii čalmmustahttá máilmmi eamiálbmogiid.
Dáiddadálu bealis mii sávvat Ánne Kátjái lihkku bargguinis, ja mii illudit oaidnit su čájáhusa boahtte jagi Davvi-Norgga riemuin!
Háliidat go eanet oahpásmuvvat dáinna čeahpes govvejeddjiin? Raba su siiddu dás: Ánne Kátjá Gaup
