Dáiddadállu oažžu dán jagáš Munch Award!
Dáiddadállu oažžu dán jagáš Munch bálkkašumi dan barggu ovddas maid leat dahkan sámi dáidaga ja kultuvrra ovddideamis ja nannemis. Bálkkašupmi geigejuvvo seremoniijas Oslos golggotmánu 23. b. 2026.
Juolludeapmi lea dehálaš dohkkeheapmi dan sajádagas mii Dáiddadálus lea, sámi dáiddáriid ja kulturbargiid deaivvadansadjin, bargosadjin ja ovddidanarenan. Vuođđudeami rájes, mii lei 2014:s, lea Dáiddadállu hábmen dáiddalaš infrastruktuvrra mii hukse struktuvrraid, ovttasbarggu ja doaibmanvejolšvuođa sámi dáidagii.
Fierpmádagas leat máŋgga fágasuorggi ja buolvva dáiddárat, geain lea nana gullevašvuohta Sápmái, ja dat ovddida dáiddalaš lonohallama sihke sisriikalaččat ja riikkaidgaskasaččat.
Máret Ánne Sara Tate Modern museas, Londonis (2025)
Govva: DD
Huksen juoidá mii váillui
Vuođđudeaddji Máret Ánne Sara oaidná ahte juolludeapmi lea dohkkehus dan bargui maid dáiddárat ieža leat vuolggahan, ja mii lea vuolgán sin iežaset dárbbuin, vásáhusain ja hástalusain:
– Dáiddadállu vuođđuduvvui ja huksejuvvui vuođu rájes danne go infrastruktuvra maid mii sámi dáiddárat dárbbašeimmet, ii gávdnon. Dáiddadállu ii galgga dušše hukset dáidaga, dáiddárvuođa ja institušuvnna, muhto maiddái hukset autonomiija sámi rasjonálitehtii ásahuvvon dáiddasuorggis. Sámi dáidagis lea eará diehtovuogádat go oarjemáilmmi struktuvrrain maid ala suorgi lea huksejuvvon. Min bargu duddjo stuorát saji sámi máhttui ja sámi perspektiivvaide ásahuvvon dáiddaásahusain ja -arenain. Go mii nannet sámi iešmearrideami dáidagis, ásahusaid ovdánahttimis ja go mii deaivvadit politihkalaš ja hálddahuslaš vuogádagain, de dat nanne sámi dáiddáriid, sámi dáidaga ja servodaga mas dat eallá.
Dine Arnannguaq Fenger Lynge, beaivválaš jođiheaddji
Govva: Ken Are Bongo/DD
Mearkkaša ollu Dáiddadállui
Dáiddadálu beaivválaš jođiheaddji Dine Arnannguaq Fenger Lynge mielas lea Munch bálkkašupmi dehálaš dovddastus:
– Mii leat ollu jagiid garrasit bargan hukset Dáiddadálu dakkárin go dat lea dál. Lea leamaš sáhka ásahit arena ja infrastruktuvrra gos sámi dáiddárat sáhttet ovdánit, bargat, ovttasbargat ja deaivat máilmmi iežaset eavttuid vuođul. Danin dát bálkkašupmi mearkkaša olu midjiide. Dat lea dovddastus dan bargui mii lea dahkkojuvvon máŋggaid jagiid, olbmuide geat leat huksen Dáiddadálu, ja das man dehálaš dat lea ahte gávdnojit nana sámi dáiddaásahusat. Seammás addá dát bálkkašupmi midjiide movtta joatkit Dáiddadálu ovddidemiin.
Munch Čuorvvas!
Maŋŋil go Munch lei dieđihan Dáiddadállui bálkkašumi birra, de vuolggahuvvui prošeakta Munch Čuorvvas!, mii bovdii fierpmádaga dáiddáriid ja jurddašeddjiid dulkot Munch dáiddalašvuođa sámi geahčastagas. Prošeakta hástala sin čájehit ja dulkot Munch jurddašeami ja historjjá, ja rahpat vejolašvuođa gulahallamii, konfrontašuvdnii ja oktasaš jurddašeapmái Edvard Munch ja dálá sámi vásáhusaid gaskkas.
Dát čuovvu Dáiddadálu bargovuogi, mii galgá fállat vejolašvuođaid dáiddalaš ovdáneapmái ja jurddašeapmái. Válljejuvvon barggut ovdanbuktojuvvojit bálkkašumi geigejumi doaluin golggotmánu 23. beaivvi Munch feastasálas.
Árvvoštallanjoavkku vuođuštus:
MUNCH-bálkkašumi jury háliida gudnejahttit Dáiddadálu sin mearkkašahtti barggu ovddas álgoálbmot dáiddáriid doarjumis, ja go sii aktiivvalaččat buktet álgoálbmotmáhtu ja -perspektiivva ásahuvvon dáiddabirrasiidda.
Dáiddadállu lea sámi dáiddárfierpmádat Guovdageainnus mas leat badjel 20 dáiddárguoimmi ja hálddahus. Fierpmádat ovddasta dáiddasurggiid nugo govvadáidaga, filmma, dánsuma, teáhtera, koreografiija, TV-buvttadeami, lávdedáidaga, designa, girjjálašvuođa, musihka ja luođi. Dáiddadállu ásaheigga dáiddár ja girječálli Máret Ánne Sara ja koreográfa ja filbmadahkki Elle Sofe Sara 2014:s, mas lea sámi dovddastusteoriija vuođđun. Dáiddadálu doaibmá fierpmádahkan fokus lea háhkat ja hukset infrastruktuvrra - juoga mii ovdal lea váilon sin dáiddalaš doaimmas. Solidaritehta ja bistevašvuođa deattuhemiin sii áimmahuššet boahttevaš buolvvaid seammás go sii gudnejahttet boarrásiid. Vaikke vel sii leat ge sajáiduvvan iežaset servodagaide, de sii hástalit maiddái sámi kultuvrra siskkáldasat, álo dainna ulbmiliin ahte oainnusmahttit ja hástalit dan mii lea bistevaš.
Árvvoštallanjoavkku lahtut: Wanda Nanibush, Yvette Mutumba, Cosmin Costinaș, Tone Hansen ja Tominga O'Donnell
Press photos / Press govat: CREDD DÁIDDADÁLLU
