Ánne Kátjá Gaup
- 1996
- Govvejeaddji
- Guovdageaidnu
Ánne Kátjá Gaup lea riegádan ja bajásšaddan boazodoalus Guovdageainnus. Son bargá govvejeaddjin, filbma- ja tv-buvttademiiguin. Ánne Kátjá lea bargan ámmát govvejeaddjin 2014 rájes, ja bargá eanaš fitnodagaiguin, portreahtaiguin, heajaiguin. Dasa lassin lea son spesialiseren govvet bohccuid lunddolaš birrasiin. Ánne Kátjá eaiggáda ja jođiha Johtti Productions AS fitnodaga Guovdageainnus.
Govvejeaddji: Ánne Kátjá Gaup
Photo: Ánne Kátjá Gaup/Johtti Productions
Ánne Kátjás lei 17-jahkásažžan vuosttaš govvačájáhus, man gohčodii Boazodoallu – min eallin, mii čájehuvvui Guovdageainnu Thon hoteallas 2013:s. Čájáhusas ledje 10 stuorra gova boazodoalu fáttás.
Sus lea stuorra beroštupmi filbma ja tv-buvttadeamis, ja lea maid gazzan oahpu suorggis, mas sus lea bachelorgráda TV-rešisseremis ja čiekŋudeapmi máŋggakámerabuvttadeamis. Oahpu son lea gazzan beakkán TV-oahppobáikkis Lillehammeris.
2020:s ráhkadii oanehisfilmma fárrolaga Romsalaččain Grete Andrea Kvaalain. Filmma namma lea “Buot iežan bohccuid dovddan” ja lea Ánne Katja áhku eallimis boazodoalus. Ánne Kátjá filbmii ja čuohpai filmma, ja Kvaal fas rešisserii. Sihke NRK ja Sámediggi leat oastán filmma. 2022 válljejuvvui son oahpahallin máilmmi stuorimus animašuvdnabuvttadanfitnodahkii, namalassii: Walt Disney Animation Studiosii Burbankas, Los Angelesas. Doppe beasai oahpahallat čeahpimusaid searvvis.
Govvejeaddji: Ánne Kátjá Gaup
Govvejeaddji: Ánne Kátjá Gaup
«Mun govvejin vuosttaš háve heajain 13-jahkásažžan. Mun in lean bálkáhuvvon govvejeaddjin, muhto mus lei kámera fárus mainna govvejin iđđedis eahkedii. Mu mielas lea somá geahččat dološ govaid maid lean govven. Mun oažžugohten govvenbargguid 16-jahkásažžan ja čájehin govaidan vuosttaš háve jagi maŋŋil»
Ánne Kátjá liiko ráhkisvuođas, ja bargá ge danin headjagovvejeaddjin Finnmárkkus ja Romssas. Su kundarat čilgejit su vuogas ja čeahpes olmmožin, gii máhttá govvet čáppa govaid ja oažžu olbmuid čájehit iežaset luonddu govvedettiin. Govat čilgejuvvojit áiggeheapmin, hármonalažžan ja ávddalažžan. Ánne Kátjá maŋemuš stuorát prošeakta lei Ole Giævera filbma Ellos eatnu, mas Ánne Kátjá barggai buvttadankoordináhtorin. Filbma oaččui buori máhcaheami ja nominerejuvvui gávcci kategoriijas Amanda bálkkašumiin ja vuittii golmma kategoriijas. Ellos eatnu sáhttá šaddat filbma maid Norga sádde 2023 Oscar juohkimii
Sámevuohta lea vuosttažettiin oassin sus ja boahtá ovdan máŋgga ládje su bargguid bokte. Ii leat álo nu álki sániiguin čilget mo sámevuohta lea oidnosis, muhto dat boahtá ovdan su bargovugiid bokte, mot son omd. deaivvada olbmuiguin ja maid áicá govvedettiin. Luondu lea stuorra oassi Ánne Kátjá govain ja geavaha maid danin luonddu sierra elemeantan govain. Luondu addá eallima, bohccuide eallima ja olles min leahkin lea sorjavaš lundui. Ánne Kátjá bargá dávjá gullevašvuođa fáttáiguin ja ságastallamiiguin sámi kultuvrras ja erenoamážit boazosámi kultuvrras.
Contact Ánne Kátjá:
Mail: info@johttiproductions.no
Phone: +47 464 76 228
Web: www.johttiproductions.no