Viimmat lea Sarakka teáhterbihttá lávddis!
«Sámi bucketlistu» lea dat vuosttaš bihttá man Sarakka Gaup lea čállán. Ieš lea oahppan neavttár, muhto sus lei miella muitalit iežas sániiguin movt sáhttá leat, go olmmoš ohcá iežas identitehta.
– Dat lea leamaš hui somá ja veahá váttis, muitala Sarakka dán barggu birra. Su mielas lea dát leamaš buorre vásáhus, mainna lea oahppan ollu ja viiddidan iežas dáiddalaš virggi.
Nieguid ollášuhttin
Bucketlistu lea listu man olmmoš čállá, gos leat su niegut ja háliidusat – dat maid son háliida dahkat dahje vásihit eallimis.
Bihttá «Sámi bucketlistu» muitala Iŋggá birra, gii ii máhte nu ollu sámi kultuvrra ja árbevieruid birra. Sáve-oambealli hástala su ráhkadit listtu mii galgá dahkat ahte Iŋgá šaddá buoremus sápmelaš goassege – albma sámi sáŋggár.
Váldogovas: Marte Fjellheim Sarre ja Anja Saiva Bongo Bjørnstad. Govven: Aslak Mikal Mienna/Beaivváš
Dramatihkkar Sarakka Gaup.
Govva: DD
Váldoolmmoš Iŋgá dán bihtás sáhttá veahá muittuhit dramatihkkara Sarakka.
Son muitala ahte giehtačálus lea boahtán su siste, go Sarakkas lea alddis dákkár sámi bucketlistu. Sarakka muitala ahte su bucketlistus lea čuoggá mas čuožžu ahte son háliida čállit ođđa sámi teáhterbihtá.
Dál sáhttá dan merket «čađahuvvon».
Sávvá gehččiid reaškit
Bearjadaga, čakčamánu 26. beaivvi lea vuosttaščájálmas, ja Sarakka mieđiha ahte son lea hui speanta.
Sus lea buorre dovdu. Son oaidná ahte bihttá lea ráhkaduvvon hui «coola» vugiin.
– Mun sávan dat šaddá nu ahte geahččit boagustit ja rešket, vaikko fáddá bihtás lea identitehta, politihka ja sámi servodaga birra, mii iešalddis ii leat dušše leaika.
Sarakka muitala iežas dán barggu bokte oahppan ahte sámi servodat lea oalle rabas, ja ahte ođđa jurdagat leat bures boahtin.
Marte Fjellheim Sarre, Anja Saiva Bongo Bjørnstad, Nils Henrik Buljo, Ingá Márjá Sarre ja Kristian Tapio - Sámi bucketlistu (2025)
Govven: Aslak Mikal Mienna/Beaivváš
Son lea giitevaš go lea beassan bargat prošeavttas «Sápmi muitala/forteller», mii lea ovttasbargu Dramatikkens hus ja Beaivváš teáhtera gaskas.
Sarakka Gaup lea okta Dáiddadálu dáiddárguimmiin, ja buvttademiin leat maiddái eará guoimmit bargan, nu go Ingá Márjá Sarre, Anja Saiva Bongo Bjørnstad, Anitta Suikkari, Rawdna Carita Eira ja Anthoni Hætta.
Vuosttaščájálmas lea Guovdageainnus, ja golggotmánus vuolgá teáhter guhkit čájáhusmátkái.
- Buot dieđuid bileahtaid, bihtá ja čájálmasbáikkiid birra sáhtát lohkat Beaivváža neahttasiiddus.
- Dáppe oahpásmuvat eanet min dáiddárguimmiin: Ellána Bireha Aillo Sarakka.
Anitta Suikkari - Sámi bucketlistu (2025)
Govven: Aslak Mikal Mienna/Beaivváš
