Govva: Sheri Determan (Ghost Rocket Music)

Dáiddárguoibmi Elle Márjá Eira vuittii musihkkagilvvu man Ghost rocket Mission lei vuolggahan.

Miessemánus dat almmuhuvvui máilmmeviidosaš gilvu man Andøya Space bijai johtui ovttas NASA:in, Ghost Rocket Music:ain ja Hollywood Independent Music Awards:ain (HIMA). Sii háliidedje gávdnat lávlaga mii galgá čuojahuvvot go sáddejit dutkanrakeahta gomuvuhtii skábmamánus.

Muhtun oahpis dat evttohii Elle Márjái ahte son berrešii searvat dán gilvui, ja nu son sáddii «Áva» nammasaš lávlaga dohko. Ii jurdilan šat maide dan birra ovdal go oaččui dieđu ahte su lávlla gilvala ovcci eará lávlagiin.

Suoidnemánus son mátkkoštii Hollywoodii, oassálastit HIMA-bálkkašumi doaluide, ja doppe almmuhuvvui ahte son dat lea vuoitán.

- Munnje gal lea nu hirbmat stuora gudni go juste mu lávlaga válljejedje, dadjá Elle Márjá.

"Áva" lea dan birra go deaivvada dovdameahttumiin; juoga mii sáhttá leat olggobealde, vuoiŋŋalaš dahje čilgemeahttun fenomena mii dovdo sihke guhkkin ja lahka. Ahte geasuhuvvo juoga man guvlui mii ii oidno, muhto baicca lea dego čiekŋalis dovdu. Lávlaga lea son ráhkadan ovttas Morten Petterseniin.

Giitosártnis son deattuhii man dehálaš lea ahte sámi ja eamiálbmogiid jienat maiddái gullojit.

Skábmamánu 12. beaivvi lea njuolggosátta Ánddasullos, go sáddejit dutkanrakeahta gomuvuhtii ja "Áva" lávlla čuojahuvvo dan oktavuođas.

Čuovo fal mielde!

Loga eanet Ghost Rocket prošeavtta birra dás (eŋgelasgillii).