Sámi Grand Prix 2021
Sámi Grand Prix lea oktain jagi stuorámus dáhpáhusain oallugiidda. Nu lea min dáiddárguoibmái Ken Are Bongoi, guhte bargá Sámi beassášfestivála hoavdan. Son lea 2019 rájes bargan festiválahoavdan, ja lea dáid beivviin gárveme buvttadeami, mii lea dán jagi báddejuvvon studioin Guovdageainnus, Gironis, Ánáris ja Moskvas. – Luođit ja sámi musihkka olaha viidát Sámi Grand Prix dihte ja dan bokte šaddet maid ođđa artistat. Gilvu lea buot stuorámus čoahkkaneapmi sámi musihkariidda, muitala Bongo.
Sámi Grand Prix streamejuvvo
Dán jaga gilvu lea beassášlávvordaga dii. 18:00 NRK 2. Gilvvus lea juoigan- ja lávlunoassi, ja buot luođit ja lávlagat galget ođđasat leat ja sámegillii. Lávlut ja juoigit guhte oassálastet bohtet miehtá Sámi. Festiválahoavda illuda showii.
– Buvttadit dán jaga Sámi Grand Prix mii galgá NRK2:is sáddejuvvot lea buktan olu buriid ja miellegiddevaš vásáhusaid. Lea nu mearehis deŧalaš gilvu sámi musihkii ja mis leat oasseváldit mielde miehtá Sámi. Otna dili geažil leat ráhkadan TV-studioid buot njeallji riikain vai sáhttit čađahit gilvvu. Dasa lassin lea jienasteapmi njuolgga Guovdageainnus, ja buohkat sáhttet jienastit iežaset jiellat šuoŋa. Mun lean nu gealdagasas ja SGP 2021 šaddá hui somá, dadjá Bongo.
Dáiddárguoibmi searvá
Okta dain lávluin gii lea gilvaleame Sámi Grand Prix:as, lea min dáiddárguoibmi Ingá Márjá Sarre. Ingá Márjá searvá ovttas beakkán lávluin Ailu Valliin, ja sunno šuoŋa namma lea Beassášlihkku. Sarre lea vuordán jo jagi dán stuorra dáhpáhussii, ja illuda sakka.
– Šáddá hui somá, ja lea duođaid niehku mii ollášuvvá, dadjá Ingá Márjá.
Oktain deŧaleamos lávddin sámi musihkkii
SGP lágiduvvui vuohččan jagi 1990:s. Ulbmil lei oažžut ođđa luđiid ja lávlagiid oidnosii, ja dan rájes leat 176 lávlaga ja 289 luođi riegádan. 311 dain leat almmuhuvvon. Áillohaš rohki 50- jagi beaivvi oktavuođas ráhkaduvvui musihkkabálkášupmi su namas. Bálkkašupmi lea artistii, juoigái, musihkkárii, jovkui dahje earái gii bargá sámi musihkain Áillohačča vuoiŋŋas ja juhkkojuvvo jahkkašaččat SGP oktavuođas.
– Min mihttu lea loktet beroštumi sámi gielaide ja ahte nu olu sámi giellabáikkit go vejolaš galget leat ovddastuvvon dán musihkkagilvvus. 2019 ledje oasseváldit 6/10 sámi giellabáikkiin ovddastuvvon. Min stuora mihttu lea ahte buot 10 giellabáikit galget mielde juohke jagi. Mii leat jo buori muttos, loahpaha festiválahoavda.
