Čájáhus Eanangiella - Voice of the land rahppo almmolaččat 16.1.2026 Oulu Art Museumas, ja doppe leat ollu iešguđetlágan dáidagat.
Dáiddárguoibmi Ann-Sofie Kallok lea okta badjelaš 70 dáiddáris geaid barggut leat dán čájáhusas, mii bistá miessemánu 3. beaivái.

Ann-Sofie lea rámis go su avant garde duodji čájehuvvo juste fal Oulus:

– Lean hui ilus go beasan leat mielde dákkár stuora čájáhusas go Eanangiella – Voice of the land. Dát lea maiddái oassin Oulu 2026:s Eurohpá kulturoaivegávpoga doaluin, mii dahká dan liige stuorisin, ja mun illudan duođaid rahpamii, dadjá son.

Olles vahkkoloahpa leat doalut mat leat čadnon čájáhusrahpamii, ja dat álget bearjadaga 16.1., dii 17.00 (Suoma áigi).

Kulturoaivegávpoga doaluide gullá sierra oassi man gohčodit Risku, ja doppe leat ge máŋga sámi fálaldagaOulu 2026 almmolaš prográmmas. Risku galgá čalmmustahttit ealli, rájehis sámi kultuvrra. Raba prográmma Oulu 2026 siiddus, vai oainnát goas leat čájálmasat, konsearttat ja čájáhusat doppe.

Lassin Ann-Sofie Kallokii, de leaba guokte eará dáiddára maiddái DD guoimmit, namalassii Hilde Skancke Pedersen ja Hilda Länsman.

Ann-Sofie duodjedáidaga leat máŋggas beassan vásihit máŋgga sajis, miehtá máilmmi.

Bihttá Guoddi ovttastahttá dáidaga, dánsuma ja musihka, ja dan lea Ann-Sofie buvttadan fárrolaga earáiguin; Ánna-Katri Helander, Anthoni Hætta ja Sebastian Björkman.

Diibmá sii johte viidát bihtáin, earret eará Johkamohki márkaniin, KulturSápmi doaluin Guovdageainnus, Bonavista biennales Kanadas ja Suialaa Art Festiválas Kalaallit Nunaatas.

Go dánsejeaddjit eaba guotte Ann-Sofie čiŋaid, de leat dat oaidninládje čájáhusbáikkis, nu go dál leat Oulu Art Museumas.

Loga eanet Guoddi čájálmasa birra, mii buvttaduvvui Dáiddadálu 10 jagi ávvudeapmái.