Geasi ságat ja čavčča doaimmat

Ođđasat 14.08.25

Geassi manná loahpaguvlui, ja čakča lea boađi boađi. Kaleandaris leat ollu doaimmat mat vurdet min dáiddárguimmiid. (Govva: Ken-Are Bongo, Erasmo Genzini ja Sissi Kaarina Jomppanen)

Susanne H RR 2 — Anna-Stina Svakko muitala. Govva: DD.

Geassi ii lean dušše luopmu

Riddu Riđđu festiválas čájehuvvui «Suoidnekaboom». Čájálmasas leigga mielde Anitta Suikkari ja Anja Saiva Bongo Bjørnstad. Máret Ánne Sara lea leamaš dáiddalaš jođiheaddji, ja son lea maiddái hábmen dáidagiid mat adnojit čájálmasas. Suoidnekaboom čájehuvvui vuosttaš geardde Dáiddadálu 10 jagi ávvudeami oktavuođas.

Susanne Hætta dáidda «Dan botta go vuorddašat soabadeami» lei maiddái Riddu Riđus. Susanne bovdii olbmuid gáfestallamii golbma beaivvi. Guossit čohkkájedje dulljiid alde ja ságastalle iešguđetlágan fáttáin; duoji, árbevieruid jávkama ja duohtavuođa ja soabadeami birra.

Anitta, Anja, Máret Ánne ja Susanne galget čakčat bargat eará prošeavttaiguin. Daid oainnát vuollelis dán artihkkalis.

Ken Are Bongo ges lea bargan rešissevran tv-ráiddus «Torna a Surriento». Dát bargu lea dolvon su Anárii ja Napoli gávpogii Italiai. Jens Martin Mienna dat lea čállán dán ráiddu man Internašunála Sámi filbmainstituhtta lea leamaš mielde ruhtadeame.

Ii leat vel almmuhuvvon goas ja gos dát ráidu sáddejuvvo.

KS Gdg Juni25 187 2160px — Guoddi Gdgs. Govva: DD.

Bonavista biennale (16.8 – 14.9.2025)

Bonavista biennale lea festivála mii bistá olles mánu, ja dat lágiduvvo Newfoundland:s, Kanadas juohke nuppi jagi.

Dáiddadállu lea dán jagáš prográmmas «Guoddi» čájálamasain, ja dat čájehuvvo guovtte háve.

Borgemánu 16. ja 17. beaivvi leat Ann-Sofie Kallok, Ánná-Katri Helander ja Sebastian Björkman doppe, go bihttá čájehuvvo Garrick Theateris. Musihka dán bihttái lea Anthoni Hætta ráhkadan.

Ann-Sofie, Ánná-Katri ja Sebastian maiddái servet panelságastallamii mas fáddán lea “Collective Movement: Artmaking in, with, and for Community”.

Loga eanet festivála birra dás: https://bonavistabiennale.com/events/

FINN Harstad 23juni25 37 2160px — Govva: DD.

Sámi bucketlistu (26.9 - 3.11.2025)

Sarakka Gaup lea čállán iežas vuosttaš teáhterbihtá, ja das lea vuosttaščájálmas Sámi našunálateáhter Beaivvážis čakčamánu 26. beaivvi, dii 19.00.

Bihttá lea nuorra sámi nissona birra gii dovdá ahte son ferte ollu máhttit, vai lea "albma sápmelaš".

Maŋŋel vuosttaščájálmasa vuolgá teáhter guhkes mátkái, ja dat čájehuvvo miehtá Norgga, lassin oktii Gironis ja oktii Ohcejogas.

Dán buvttadeamis leat maiddái eará dáiddárguoimmit mielde;
Neavttárat Anitta Suikkari, Anja Saiva Bongo Bjørnstad, Ingá Márjá Sarra, musihkkarat Anthoni Hætta ja Roger Ludvigsen, ja goziheaddji Rawdna Carita Eira.

Loga bihtá birra dás: https://beaivvas.no/sami-bucketlistu-2025-cajalmas/

Small Boine Bugge Oslo World2023 Lars Opstad 068 scaled — Preassagovva. Govva: Lars Opstad.

Vástádus eana – The answer is land (9.10 - 2.11.2025)

Dánsun- ja juoigan-čájálmas lea geasset čájehuvvon Jacob’s Pillow doaluin Massachussets:as, USA:s, ja čakčat joatká sin čájálmasmátki. Elle Sofe Sara lea dáinna bargan 2021 rájes, ja dasa lea ain stuora beroštupmi.

Golggotmánu 9. beaivvi lea čájálmas Guovdageainnus, ja de álgá riikaviidosaš mátki, mii loahpahuvvo Oslos, skábmamánu 2. beaivvi.

Oza dáppe fitná go čájálmas doppe gos don leat: https://www.riksteatret.no/repertoar/vastadus-eana-the-answer-is-land/

FINN Harstad 23juni25 143 DD 2160px — Govva: DD.

Tate modern Turbinehall – London (14.10.2025 - 6.4.2026)

Máret Ánne Sara lea vuosttaš sápmelaš (ja norgalaš) gii lea bovdejuvvon cegget čájáhusa beakkán Tate Modern Turbinehall:s, Londonis.

Áibbas ođđa čájáhusa rahpan lea golggotmánu 14. beaivvi, ja dat bistá gitta cuoŋománu 6. beaivái 2026.

Máret Ánne lea dán jagi leamaš Davvi-Norgga riemuid váldodáiddár, gos su čájáhus «Háhčeaštni doali dádjadit» lei oaidninládje.

Dat maid Londonis čájeha, lea juoga áibbas eará, muitala son.

Loga eanet dás: https://artlab.hyundai.com/project/hyundai-commission-maret-anne-sara

Suialaa arts festival – Nuuk (23.10 - 26.10.2025)

Dáiddadállu searvá Suialaa Arts Festiválii Nuuk:s, Kalaalit Nunaat:s olles vahkku.

Dán festiválii servet arktalaš guovlluid dáiddárat, ja doppe leat sihke konsearttat, čájáhusat, čájálmasat, seminárat ja ságastallamat. Dáppe lea maiddái Susanne Hætta "Dan botta go vuorddašat soabadeami".

Loga eanet Ruonáeatnama stuorámus festivála birra: https://suialaa.gl/en/home

Láhppon (31.10.2025)

Elle Sofe Sara lea dán jagi maiddái bargan ođđa čájálamasain, «Láhppon».

Dán bihtás lea fáddán dat mii dáhpáhuvai Guovdageainnu stuimmiin, ja dat lea vuosttaš geardi go Beaivváš ovttasbargá Našuvnnalašbaleahtain.

Čájálmas čájehuvvo vuosttaš háve Operas, Oslos golggotmánu 31. beaivvi. Skábmamánus dat čájehuvvo ges Čoarvemáddagis Guovdageainnus, 14.11 ja 15.11.

Loga eanet čájálmasa birra dás: https://beaivvas.no/lahppon-2025-cajalmas/

Team Jordens hjärta — Elle Márjá Eira, Britta Byström & Rawdna Carita Eira. Govva: Kungliga Operan / Maria Paulsson.

Eatnama váibmu – Jordens hjärta (15.11 - 29.12.2025)

Vuosttaš háve historjjás čájeha Kungliga Operan opera sámegillii. Dáinna bihtáin leaba Rawdna Carita Eira ja Elle Márjá Eira bargan. Rawdna Carita lea čállán sisdoalu (libretto), ja Elle Márjá ges lea leamas bagadalli.

Skábmamánu 15. beaivvis gitta juovlamánu 29. beaivái čájehuvvo dát bihttá Stockholmmas. Fáddán lea sámi sivdnádus-muitalus, gos bahá ja buorre riidaleaba ja movt olmmoš galgá eallit luonddus.

Fuomáš! Jus leat Stockholmmas borgemánu 17. beaivvi, de lea vejolaš gullat oasáža sámi operas Eatnama váibmu/ Jordens hjärta. Dán konsearttas besset guldaleaddjit váshit oasážiid dain bihtáin maid Kungliga operan čájeha čavčča rájes.