Dáiddadállu lea Háršttáin!
Dáiddadállu searvá Davvi-Norgga riemuide, go dán jagi lea sámi dáidda oassin máŋgga sajis prográmmas.
Govat: Knut Åserud
Dán jagi riemuin lea erenoamáš stuoris ahte min iežamet vuođđudeaddji ja dáiddárguoibmi Máret Ánne Sara lea válljejuvvon dán jagi dáiddárin – dárogillii årets festspillkunstner.
Su čájáhus «Háhčešeatni doali dádjadit» lea Støperiet nammasaš čájáhusbáikkis.
Geahččit besset dán háve vásihit movt Máret Ánne Sara guorahallá ođđaáigásaš materiála ja servodatlaš logihka sámi filosofiija -ja máilmmigovaid deaivvadeamis. Stuorámus oasit su dáidagis leat skohtterbealttat mat heaŋgájit dáhkis láhttái. Muđui leat čájáhusas metálla, sisti, rássi ja rissit.
Almmolaš rahpan lea geassemánu 21. beaivvi, dii 14.00
- Gos: Støperiet
- Goas: 22.6 - 28.6, dii 12.00
Loga dás maid lágideaddjit muitalit dárogillii Máret Ánne čájáhusa birra
«Čitna Báffa» - lassi fálaldat čájáhusa oktavuođas
Dat dáhpáhuvvá čájáhuslanjas, ja dánsejeaddjit geavahit skohterbealttaid ávkin iežaset čájálmasas.
Alexandra Wingate, Anitta Katriina Suikkari, Anja Saiva Bongo Bjørnstad ja Ina Dokmo dat leat ovttasbargan Máret Ánne Sarain dán buvttadeamis.
Jietnabarggu vuođđun leat musihkat maid Katarina Barruk, Arnljot Nordvik ja Eirik Fjelde leat ráhkadan, ja dat leat dasto heivehuvvon oktii Máret Ánne Sara, Elin Már Øyen Vister ja Kristine Hansen jietnabáddemiiguin.
- Gos: Støperiet
- Goas: 24.6 ja 25.6, dii 21.00
Skuvlamánáide sierra fálaldat
Hárštak skuvllaid astoáigefálaldaga mánát ožžot sierra čájáhus galledeami olles vahku. Dáiddadállu lea leamaš mielde hábmeme prográmma skuvlamánáid váste, ja bovde sin geahččat čájáhusa, gullat máidnasiid ja duddjot.
Sin láidesteaddji dáid beivviid lea dáiddárguoibmi Sarakka Gaup.
- Olles vahku dii 11.00 – 13.00 – dušše bovdejuvvon mánáide
Nordaførr lea dehálaš oassi prográmmas
Golmma beaivvis servet iešguđetlágan kultursuorggi olbmot dán deaivvadanbáikái, gos leat čájálmasat, konsearttat ja dáiddavásáhusat.
Vuosttaš beaivvi lea paneladigaštallan «Dábálaš áššit dahkkojuvvon bassin», mii muđui lea ge fáddán dán jagi festiválas.
Dán digaštallamis leat mielde dáiddár Máret Ánne Sara, Stefan Schmitke (direktevra eurohpalaš kulturoaivegávpot Chemnitz), Jacob Wren (girjjálašvuođa, čájálmasaid ja čájáhusaid ráhkadeaddji) ja Sonya Lindfors (koreográfa ja aktivista)
Seamma beaivvi lea maiddái dat oassi man gohčodit «Meet the North».
Doppe Dáiddadállu lea okta dain bovdejuvvon ásahusain, ja mii čájehit iežamet historjjá ja doaimmaid birra.
- Gos: Nordic Hall
- Goas: 22.6, dii 10.00 – 15.00
Daid eará beivviid prográmma gávnnat dáppe: Nordaførr 2025
Dáiddadállu sessions
Fierpmádaga logi jagi doaimmas lea Dáiddadállu – Sámi Dáiddárfierpmádat bargan ulbmillaččat čalmmustahttit sámi dáidaga našunála ja riikkaidgaskasaš arenain. Mii dokumenteret ja gaskkustit máhtu iešguđetlágan gulahallanvugiid bokte – nugo ságastallamiid, filmmaid, podcastaid ja fágaidgaskasaš prošeavttaid bokte.
Dál mii bovdet Dáiddadállu Sessions ságastallamiidda, ovttasbargoguoimmit leat Festspillene i Nord Norge ja KORO.
1. Artist talk: Eamiálbmotmetodihkka ja filosofalaš lahkoneapmi Máret Ánne Sara dáidagii.
Oassálastit: Máret Ánne Sara, Drew Snyder (KORO), Ragnheiður Skúladóttir (Dir. Festspillene) ja Dine A. Fenger Lynge (DD).
- Gos: Støperiet
- Goas: 23.6, dii 15.00
2. Artist talk: Čitna Báffa
Oassálastit: Anitta Suikkari, Anja Saiva Bongo, Alexandra Wingate ja Ina Dokmo. Moderáhtor lea Siri Broch Johansen.
- Gos: Støperiet
- Goas: 25.6, dii 15:00
Rukses telefuvdna
Jus leat Háršttain it ge dieđe maid galggat bargat, de sáhtát ohcat rukses telefuvnna. Dán telefuvnnas don searvvat ságastallamii mii sáhttá guoskahit du dovdduid ja čuvgehit du jurddašanvuogi.
Dáiddárguoibmi Juho-Sire / Siri Broch Johansen dat lea čállán teavstta man olbmot sáhttet vásihit dán rukses telefuvnnas.
Áibbas nuvttá!
- Hilsegata
- 21.6 - 25.6
Loga eanet dás, ja geahča rahpanáiggiid - dat eai leat álo seamma áigái: Red phone
XN HARSTAD 2025
Kreatiivvalaš ásahusaid ja mátkeealáhusaid deaivvadeapmi.
XN Harstad doaluin Dáiddadállu ovdanbuktá iežas barggu mii guoská áibbas ođđa fitnodagaid ásaheapmái. Min višuvdna lea váikkuhit ovdáneapmái, árvoháhkamii ja ceavzilis bargosajiide sámi servodagas. Go čalmmustahttá sámi dáidaga ja kultuvrra olgomáilbmái, de háliidit mii gokčat dan beroštumi mii lea sakka lassánan riikkaidgaskasaččat, ja seammás nannet ekonomalaš vuođu min dáiddáriidda.
Dán lágidit Innovasjon Norge Arktis, NHO Arktis, NHO Reiseliv ja Romssa fylkkasuohkan.
Dáiddadálu beaivválaš jođiheaddji Dine Arnannguaq Fenger Lynge searvá.
- Galleri Nord-Norge
- 26.6, dii 10.00 – 15.00
