Elle Sofe Sara

1984
Koreográfa ja bagadalli
Guovdageaidnu

Elle Sofe Sara lea koreográfa, bagadalli ja filbmadahkki. Son lea Unit-Ántte Rávnná ja Heik-Erke Niillasa váhkar, Ávžžis Guovdageainnus bajásšaddan. Elle Sofe barggut leat vuosttaš čalbmái árgabeaivválaš áššit, dávjá oasit sápmelaččaid gorutlihkastagain mat leat vajálduvvan ja vierut maidda kolonialisma ii leat váikkuhan. Elle Sofe rahpá saji dakkár vejolašvuhtii mas ovddeš ja dálá áigi deaivvadit.

The answer is Land 3 Photo Antero Hein — Govvejeaddji: Antero Hein

Su koreografiijain lea dávjá suohtas vuohki lahkonit fáttáid, muhto son maiddái čiekŋuda tabu-áššiide, nugo traumaide, veagalváldimii ja iešsoardimii. Elle Sofe lea álgoálbmotdáiddár ja son vállje hábmet bargguid mat áddejuvvojit seammá bures servodagas gos son ieš orru go dat dahket dáiddamáilmmis. Son lea dasa lassin okta Dáiddadálu ásaheddjiin.

1 CB Birget 2023 Haara 187 A5167 — Govvejeaddji: Haara

Beatnaga Dont judge the dog Photo Matti Aikio — Govvejeaddji: Matti Aikio

2 Sámi Bojá Foto Niels Ovllá Dunfjell — Govvejeaddji: Niels Ovllá Dunfjell

Sami boja 1 Niels Ovlla Dunfjell — Govvejeaddji: Niels Ovlla Dunfjell

Elle Sofes lea koreografiija-master Oslo Dáiddaallaskuvllas (2010) ja dánsa-bachelora Londona Laban Trinity skuvllas (2006). Son lei Davvi-Norgga riemuid dáiddárprofiila (2020, 2021), lea vuoitán Moon Jury bálkkašumi Imagine Native Filbmafestiválas (2019). Son lea maid okta njealji filbmadahkkis gii válljejuvvui Talent Norge filbmadahkkiprográmmii (2020-2023). Go son ii leat bargame koreografiijain dahje filmmain, dahje bargomátkkis, de lea ealloravddas isida mielde dahje mánáide oahpaheame árbevirolaš bargguid.

Oahpásmuva Elle Sofe Sarai dán filmmaža bokte.

Hárjehallanoasáš Vástádus eana/The answer is land čájálmasas.

BIRGET; ways to deal, ways to heal, 2023.

2025:s čájehuvvui Elle Sofe luohte-báleahta Láhppon / Lost, mas lei vuosttaščájálmas Den Norske Opera and Ballett:s Oslos. Dát lei vuosttaš geardi go sámi baleahtta lei sin váldolávddis. Čájálmasa fáddá lei Guovdageainnu stuimmiid birra 1852:s, ja muitalus muitaluvvui juoigama ja dánsuma bokte.

Guovvamánus 2026:s lei su vuosttaš guhkesfilmma, Árru, vuosttaš čájeheapmi. Das lei máilmmi premiera Berlinale filbmafestiválas Duiskkas. Dát lei Elle Sofe vuosttaš guhkesfilbma, mii muitala Maia birra, gii searvá dáistaleapmái boazoguohtuneatnamiid billisteami vuostá. Luohti geavahuvvo máinnastanvuohkin, ja danne filmma gohčodit maiddái luohtemusikálan.