Deŧálaš olahus ja eanet innovašuvdna - Gelddolaš jahki Dáiddadálus
Dáiddadállu sávvá buot min dáiddár- ja ovttasbargoguimmiide buori ođđa jagi! Dán ođđajagimánus mis leat earenomáš stuorra vuordámušat go 2022 buktá olu gelddolaš dáhpáhusaid ja prošeavttaid Dáiddadállui sihke institušuvdnan ja dáiddárkollektiivan. Veneziabiennála ja viiddis ovdánahttinprográmma leat muhtin min stuorámus dáhpáhusain, muhto dát lea dušše unna oasáš min doaimmain 2022:s.
Piera Heaika Muotka. Foto: Jonas Driveklepp
Mii leat olahan ođđa mihttomeari!
Mii leat viimmat nagodan viiddit hálddahusa, ja sávvat bures boahtin min ođđa gulahallan- ja hálddahusmielbargái, Piera Heaika Muotkai guhte lea gieskat álgán olles virgái min lusá. Piera Heaikkas lea bachelor gráfalaš hábmemis, ja sus lea guhkes ja viiddis hárjáneapmi sihke gulahallansuorggis ja prošeaktabargguin sámi organisašuvnnain ja festiválain. Piera Heaika boahtá hálddašit buot min gulahallankanálaid, ja ovttasbargat Dine:in ja min eará bargiiguin buot Dáiddadálu prošeavttaiguin.
– Dáiddadálu hálddahusa viiddideapmi mearkkaša olu midjiide institušuvdnan, ja addá midjiide sihke kapasitehta ja resurssaid ovdánahttit Dáiddadálu boahtteáigái ja sihkkarastit nanu dáiddabirrasa, dadjá stivrajođiheaddji Máret Anne Sara.
Višuvnnalaš ovdánahttinprošeakta jođus
Mii leat maiddái álggahan N2-prošeavtta, ja leat nu ilus go mis lea Anja Guttorm Graven mielde prošeaktajođiheaddjin. Lea hirbmat viiddis ja gelddolaš prošeakta mainna áigut bargat boahtte 3 jagi. Prošeakta lea oassin Davvi-Norgga stuorámus áŋgiruššamiin hutkás ealáhusovdánahttimis.
Prošeakta ruhtadeaddjit leat: Gielda- ja ođasmahttindepartemeanta, Nordlándda ja Romssa ja Finnmárkku fylkkasuohkanat, Sámediggi, Ovddos, Innovašuvdna Norga Arktis ja Dutkanráđđi.
– Anjas lea mearkkašahtti ja nanu gelbbolašvuohta sihke fitnodatovdánahttimis ja strategalaš barggus, ja su máhttu lea vuođđuduvvon sámi árvvuide ja servodateallimii. Suinna fárrolaga mii galggat ovdánahttit sámi dáiddaealáhusa ja seammás nanosmahttit Dáiddadálu fierpmádahkan sámi dáiddáriidda ja hutkás ealáhusbargiide, lohká Sara.
Anja Graven
Máilmmi árvvoleamos dáiddačájáhus
Office for Contemporary Art Norway (OCA) almmuhii golggotmánus 2020:s, Sámedikkis Kárášjogas, ahte sámi dáiddárat Pauliina Feodoroff, Máret Ánne Sara ja Anders Sunna galget ovddastit Sámi ja molsut Davviriikkalaš paviljonga Sámi paviljongan dan 59. gaskariikkalaš dáiddačájáhussii La Biennale di Venezias Itálias 2022:s. Dáiddadállu boahtá dieđusge leat sajis dán historjjálaš dáhpáhusas go Sápmi vuosttaš geardde gudnejahttojuvvo našuvdnan sierra paviljongas. Mii leat ilus go min iežamet álggaheaddji ja dáiddačeahppi Máret Anne Sara lea oassin dán historjjálaš dáhpáhusas.
Dárbu ođđa vistái
Dan botta go hálddahus stuorru ja dađi eanet prošeavttat čađahuvvojit, de mis ain váilot lokálat ja kantuvrrat min doaimmaide. Dáiddadállu lea dehálaš instutušuvdnai sihke min dáiddárguimmiide, ovttasbargoguimmiide ja gussiide, ja mii duođai váillahit čoahkkananbáikki. Juste dán oktavuođas leat mii hui ilus go dál beassat muitalit ahte lea Katarina Påve Gaup Arctic Prime:as gii jođiha prošeavtta mas guorahallat vejolašvuođaid cegget ođđa ja bisttevaš Dáiddadálu. Sávvamis sáhttit farga almmuhit juste gosa Dáiddadállu fárre, ja ahte mii sáhttit fas rahpat min dálu gussiide, dáiddáriidda ja min bargiide dás (smávva, stuorra) Guovdageainnus – Sámi váibmoruohttasis.
