Sámi dáiddabiras

Ánne Kátjá Gaup lea aitto fárren ruoktot Guovdageidnui, maŋŋel go lea 8 jagi orron eará báikkiin. Dál áigu bargat iežas fitnodagain ja govvendáidagiin dáppe Guovdageainnus ja Dáiddadálus.

“Illudan hui olu leat oassin Dáiddadálus. Dáiddadálus lea nanu sámi dáiddalaš biras, ja šaddá soma ovttasbargat čeahpes dáiddariiguin. Lea máilmme mávssolaš go gávdno dákkár biras Sámis, gos beassá ovttas earáiguin bargat iežas fitnodagain ja dáidagiin”

Govvideapmi ja TV-buvttadeamit

Ánne Kátjá lea mannan giđa válbmen TV-regi bacheloroahpu Innlándda Allaskuvllas. Geasset lea bargan iešguđetgelágan TV buvttademiiguin, ja sávvá ahte šaddet eambbo buvttadeamit ovddasguvlui. Son lea maiddái NRK bargiiguin ovttas rešiseren earret eará Sámi Grand Prix.

“Mun liikon iešguđet surggiide mediamáilmmis, muhto eanemusát barggan govvejeaddjin. Lean bargan sihke ovddabealde ja maŋabealde kamera, ja lean čiekŋudan máŋggagovat tv-rešiserema. Golggotmánus čájehuvvo munno Grete Andrea Kvaala dokumentára “Buot iežan bohccuid dovddan”, mii lea mu gáibmeáhku Karen Anna Logje Gaup eallima birra. Mun lean filbmen ja čuohppan filmma, ja Grete lea rešisevra. Muđui barggan bohccuiguin ovttas iežan bearrášiin, ja mis lea bearašfitnodat The Samiway, mii váldá vuostá gussiid ja fállá sidjiide vásáhusaid Sámis ja boazodoalus” 


#@Dáiddadállu!
Dáiddadálus lea huššáš ja miellegiddevaš čakča vuordimis ja leatge danne erenoamáš ilus go leat ožzon dán čeahpes nieidda ruoktot Guovdageidnui ja iežamet searvái. Čuovo mielde min sosiálá mediaid oaidnin dihte Ánne Kátjá barggu ja muđui buot eará mii dáhpahuvva Dáiddadálus ja min dáiddáriiguin.

Eambbo Ánne Kátjá govvendáidaga birrá gávnnat Instaprofilas johttifoto ja Facebook-siiddus Johtti Productions.