Movt lei Sámi eahket Tate Modernis?
Njukčamánu 27. beaivve lágidii Tate Modern Museum erenoamáš eahkeda Máret Ánne Sara čájáhusa Goavve-Geabbil loahpaheami oktavuođas. Dáhpáhus ávvudii sámi dáidaga, kultuvrra ja vuostálastima viiddis prográmmain.
Máret Ánne Sara čájeha movt dáidda sulástahttá bohcco njuni.
Govva: Knut Åserud
Liinnid ferte divustit. Sámi filbmabargit vuostáiváldimis Tate Corner Baras.
Govva: Knut Åserud
Tate Modern ovttasbarggai Internašunála Sámi Filbmainstituhtain (ISFI) ja NANU – Sámi Arts Internationalain čohkket sámi dáiddáriid ja London ássi kreatiivvalaččaid Tate Modern Lates doaluide, gos dáiddárat sáhtte deaivvadit ja gulahallat, beroškeahttá sin duogáža ja fága.
Maiddái Norgga ambassáda oassálasttii dáhpáhussii, erenoamážit danne go sii leat guhká áŋgiruššan ovddidit deaivvademiid ja gulahallama sámi ja brihtalaš dáiddáriid gaskkas. Sávaldat lea čatnat oktavuođaid mat soitet dagahit ovttasbargguid ja ođđa buvttademiid boahtteáiggis.
Duodje-bádji lei bivnnut.
Govva: Knut Åserud/DD
Eahkedis lei čájáhus vánddardeapmi man Máret Ánne Sara ieš jođihii, gos son muitalii iežas dáiddalaš barggus ja daid installašuvnnaid duogážis mat leat čájehuvvon Turbine Hallas.
Galledeaddjit besse maiddái oassálastit duodje-bargobádjái man Elle Márjá Eira jođihii.
Filbmaságastallan, Marja Helander ja Liselotte Wajstedt.
Govva: Knut Åserud
Filbma lei guovddáš oassin prográmmas, man Internašunála Sámi Filbmainstituhtta lágidii. Doppe čájehedje earret eará Marja Helander, Liselotte Wajstedt, Hans Pieski ja Elle Márjá Eira ja Mai Lis Eira Buljo filmmaid. Maŋŋil ledje ságastallamat filbmadahkkiiguin.
DJ Radio-JusSunná @ Tate Corner Bar
Govva: Knut Åserud
Maiddái sámi musihkka gullui Tate Modern Lates doaluin. Turbine Hallas lei konsearta Katarina Barrukiin, ja Corner Baras čuojahii ges DJ Radio-JusSunná sámi musihka gitta eahkedii.
Lágideaddjit Tate Modern, Internationála Sámi Filbmainstituhtta ja NANU - Sámi Arts International ledje duhtavaččat go sámi doalut geasuhedje nu ollu olbmuid dán eahkedii gos sámi perspektiivvat, hutkáivuohta ja boahtteáiggi višuvnnat ledje guovddážis.
