Reive Kalaallit Nunaat-mátkki birra
Guovvamánus mátkkoštii Dáiddadállu Nuuk:i, Kalaallit Nunaatas, álggahit ovdabargguid min ávvučájáhussii ja performánssaide mat čájehuvvojit Suialaat Art Festivalas golggotmánus. Dát galledeapmi lei maid dehálaš oahppanmátkin Birgejupmi Through Art- prošeavtta oktavuođas.
(Govat: DD)
Birgejupmi lea prošeakta mii geahččala dohkkehit ja gaskkustit álgoálbmogiid dáiddametodaid, dálkkodeami ja soabaheami. Dáidaga ja duoji bokte háliidit mii ásahit saji ságastallamiidda ja dáiddalaš ovttasbargui mii hukse oktasaš kapasitehta dáidaga rollii servodagas.
Dáidda ja duodji šaddá dalle politihkalaš birgenreaidun, dego gaskaoapmin nannet álgoálbmogiid jiena ja kapasitehta, ja čájeha min čiekŋalis oktavuođa eatnamiin ja mearain.
Ovttas min dáiddalaš jođiheddjiin, Alexandra Wingate, dáiddáriiguin Kine Yvonne ja Joar Nango, ja stivralahtuin Beaska Niillas, vulggii DD Nuukii ovdánbuktit prošeavtta, ásahit ovttasbarggu ja deaivvadit dáiddáriiguin, kulturbargiiguin ja ásahusaiguin. Min válde váimmolaččat vuostá, liekkusvuođain, beroštumiin ja áŋgirvuođain viidáset ovttasbargui.
Muitinveara deaivvadeapmi, man Nuuk Dáiddamusea lágidii, attii midjiide vejolašvuođa juogadit Dáiddadálu ja sámi bargguid višuvnnaid, ovttas Joar Nangoin iežas Girjegumpiin.
Ávkkálaš ja movttidahtti
Nuuk, gos ásset birrasit 20.000 olbmo, lea dáidaga ja duoji guovddášsadji, ja doppe lea rikkis ja máŋggabealat kapasitehta.
Doppe gávdnojit vaikko man ollu gelddolaš áŋgiruššama mas dáidda ja duodji lea guovddážis. Mii leat vásihan áššiid mat leat ávkin ja inspirašuvdnan min iežamet proseassabargguin. Mii leat giitevaččat go leat beassan ovttasbargat ja galledit Nuuk Dáiddamusea, Suialaat Festivála, Nuuk Dáiddaskuvla, EPI, Kittat, KIMIK, Ajagaq, ja erenoamážit daid ollu čeahpes dáiddáriid, duojáriid ja kulturbargiid geat iežaset eavttuid vuođul barget dáidaga ovddidemiin.
Dát mátki lea leamaš jáhkkemeahttun vásáhus – ollu oahppat, riggodahtti ja movttiidahtti. Mii giitit buot dáiddáriid, kulturbargiid ja kapasitehta huksejeddjiid geat nu árvasit leat vuoruhan min iežaset dáidaga, borramuša, čoahkkimiid, mátkkiid ja movttiidahtti ságastallamiid bokte.
Govva: Kim Kleist dávttis ráhkaduvvon dáidda.
Rievdamat oidnojit
Birgejupmi-prošeavtta váldoulbmil lea duođaštit ja ealáskahttit álgoálbmotmáhtu, árvvoštallat rievdamiid dálkkádatheivehemiid oktavuođas ja guorahallat eanadaga nuppástuhttinvejolašvuođaid.
Mátkkis beasaimet oaidnit dárkileappot movt dálkkádatrievdamat čuhcet riikii. Doppe lei hui bivval go leimmet doppe, siseatnanjiekŋa fierai ja govddodii vuonas. Máŋggas muitaledje ahte dát ii leat dábálaš, ja ahte dan sáhttá buohtastahttit daid dálkkádatrievdamiid mat dovdojit Sámis, gos juste dál lea guohtunroassu.
Muhto dál lea áigi ahte mii ovttas rahčat min oktasaš boahtteáiggi ovddas. Dáidda ja kultuvra leat čoavddan searvevuhtii ja friddjavuhtii. Mii fertet dáidaga atnit reaidun hukset nannoset servodaga ja sihkkarastit ahte álgoálbmogiid jienaid guldalit – maiddái dalle go váilevaš resurssat ja infrastruktuvra dagahit hástalusaid.
Nugo Sámis, gos gaskkat leat stuorrát, de lea dárbu hábmet našunála, vuoiŋŋalaš váibmosa - oktasaš fámolaš vuođu. Dáidagis ja kultuvrras lea hui stuorra rolla dán vuođu huksemis. Dađibahábut ii leat dát dakkár ealáhus mii lea vuoruhuvvon álgoálbmogiid searvvis, ja dáiddáriidda lea váttis oažžut dohkkeheami ja doarjaga. Mii sávvat ahte Kalaallit Nunaata ođđa politihkalaš iešstivrejupmi oaidná dáidaga árvvu – mii lea servodaga geađgejuolgi, man ala sáhttá ain hukset eanet.
Barggut eai váillo
Qujanarujussuaq - duhát giitosa min rámálmas ovttasbargoguimmiide ja lágideaddjiide: Nivi ja su joavku Nuuk Dáiddamuseas, Joar Nango:i ja Tone Huse:i, Mark Bennett:i, Ivinnguaq Stork Höegh:i, dáiddaskuvlii, Arnakkuluk:i ja Malik:i, Sofia Amundsenii, Lisbeth Karline Paulsenii, Aka Hansenii, Birthe ja Laura Lennert:i Homoholdet:is, Aili EPI – Eqqumiitsuliornermik Pinngorartitsisut Ingerlatsisullu, Kimik:i, Suialaat Festivalii, Katuaq:i, Vivi Sörensenii Nunatta Isiginnaartitsisarfia/Nasjonalteateret, Qisuk/Tupeq Liisi Egede Hegelund:i ja Tukummeq Qaavigaq:i, Ajagaq Sannavik:i ja Kittat:i.
Mii illudit viidáset ovttasbargui dáidaga fámu nannemiin, ja joatkit oktasaš kapasitehta huksemiin vai dáidda ja dáiddárat leat guovddážis – friddja, gievrrat ja gergosat hábmet boahtteáiggi.
Dáiddadálus mii joatkit riikkaidgaskasaš konferánssa ráhkkanemiin. Doppe galget ge álgoálbmot dáiddavuogit ja buoridan- ja soabadanproseassat leat vuođđun máhtilašvuođa juogádeapmái. Bargosešuvnnaide servet dáiddárat, árbeguoddit, akademihkkárat ja báikkálaš olbmot.
Mii sávvat ahte mii sáhttit almmuhit eambbo geassemánus KulturSápmi oktavuođas. Stay tuned.
Govva: Dáiddárguovttos Kine ja Ivinnguaq leaba álggaheaddjin min barggus ráhkadit dáiddaprofiilla Birgejupmi-prošektii.
