Hilde dáidda čiŋaha dehálaš lanja ođđa ráđđehusvisttis
Dáiddár Hilde Skancke Pedersen válljii iežas mánnávuođa duovdagiid govvidit go ráhkadii dáidaga ođđa ráđđehustvistái mii rahppui almmolaččat cuoŋománus dán jagi.
Hilde Skancke Pedersen iežas bargolanjas
Govven: Gerlinde Thiessen
Bassi várri, giđđadálvi - Hellig fjell, vårvinter (2025) galgá čájehit guovllu mii ain lea buhtis – go dohko eai lea vel huksejuvvon bieggamillut, ruvket dahje báhčinguovllut.
Dáidda lea guhtta mehter guhkki ja Hilde lea geavahan boares T-báiddiid ja gávnniid go lea hábmen Hakŋalančearu, mii lea Nuorta-Finnmárkkus. Čáhppes, ránes ja vilges ivnnit govvidit dan čearu man son muitá iežas mánnávuođas. Son lea válljen dáid ávdnasiid go sutnje lea dehálaš ahte dat eai bálkestuvvo, muhto baicca šaddet ávkin. Silki mii heaŋgá vuolábealde govvida ges duoddariid, jieŋa dahje meara. Luondu man ferte várjalit.
Olles diimmá jagi lea son bargan dáidagiin, ja golbma veahki leat gaskohagaid leamaš veahkkin.
Lea KORO (Kunst i Offentlige Rom) mii lea bovden Hilde Skancke Pedersena ráhkadit dáidaga ođđa ráđđehusvisttái. Dát almmolaš fágaásahus dáhttu dáidaga bokte govvidit Norgga –maiddái unnit- ja eamiálbmogiid.
«– Munnje lea dát várri symbolan buot váriide ja lundui, man ii galggaše ávkkástallat ja billistit.»
Bassi várri, giđđageassi - Hellig fjell, vårvinter (2025)
Govva: SMK
Bassi várri, giđđadálvi heaŋgá stáhtaráđđelanjas, dat latnja gos ráđđehus earret eará Stuoradikki dohkkehuvvon lágat ja láhkanjuolggadusat formálalaččat mearriduvvojit. Dáidda mii lea válljejuvvon dán latnjii galgá čájehit ahte buot mii dán lanjas mearriduvvo, váikkuha olles servodahkii.
– Lea duođai gudni ahte mu dáidda dál lea ráđđehusvistis, muhto seammás veahá jáhkketmeahttun, dadjá Hilde.
