Dáiddadálu vuođđudeaddji Elle Sofe Sara ráhkada guhkesfilmma
Dáiddádálu vuođđudeaddji ja dáiddárguoibmi, Elle Sofe Sara, oažžu filbmadoarjaga Norsk Filminstitutt:as. Filmma namma lea Árru, ja otne almmuhuvvuige ahte filbma oažžu 6 miljuvnna ruvnna NFI Nye veier prográmma bokte.
Filbmataleanta
Mannan dálvvi Tromssa Internašunála Filbmafestivalas válljejuvvui Elle Sofe Talent Norge ja MERFILM taleantaprográmmii. Dál, 10 mánu maŋŋel, oažžu son ja buvttadanfitnodat MERFILM doarjaga buvttadit guhkes filmma.
– Dát lei áibbas vuordetmeahttun, in oro ovdal dál ipmirdeame ahte lea duohta. Lean guhká bargan oanehis filmmaiguin, inge leat duostan ge niegadit guhkkes filmma birra, go filbmamáilmmis lea nu garra gilvu. Nu issorasat illudan dán bargui go filmmas lea dehálaš muitalus, ja lea maid dehálaš ahte ráhkaduvvojit eanet sámi ja sámegielat filmmat, muitala Elle Sofe.
MERFILM lea buvttadanfitnodat Tromssas, Bergenis ja Oslos. Elle Sofe filmma buvttadeaddji lea Elisa Pirir.
Vuosttaš sámi filbmamusikála
Elle Sofe orru Guovdageainnus, ja lea koreográfa ja filbmarešisevrra. Videodáidda, filmmat, teater ja dánsun leat oasit su barggus. Iežas dáidaga bokte čalmmustáhtta son dávjá politihkalaš hástalusaid ja kultuvrralaš iešvuođaid sámi servodagas. Elle Sofe lea jo rešiseren vihtta oanehisfilmma, gos buot filmmain lea dánsun, musihkka ja koreografiija guovddážis. Dál galgá ovdanahttit iežas stiilla, ja nu šaddá ge su vuosttaš guhkes filbma musikálan.
-Filmmás mii čuovvut ovtta sámi nissona, Kari, gii vuostalda ruvkkedoaimmaid mat galget boahtit sin orohahkii. Filbma idea lea ain hui álgodásis, nu ahte in sáhte nu olu eanet muitalit juste dál, mojohallá Elle Sofe.
Don galggát dál ráhkadit vuosttaš sámi filbmamusikála. Maid jurddašat dan birra?
– Lea hui somá musikála ráhkadit. Mun liikon muitalit muitalusaid sihke dánsuma, musihka ja neaktima bokte. Mus lea dánsun ja koreográfija duogáš ja oahppu nu ahte musikála lea hui lunddolaš geaidnu munnje.
“Nye veier” ortnet
Filbmamáilmmis rehkenasto 6 miljovnna kruvdnosaš supmi leat vuollegisbušeahta spillenfilbmabuvttadeapmi. NFI ruhtadoarjja addojuvvo Nye veier-ortnega bokte ja ulbmil lea ávžžuhit rešisevrraid ja buvttadeddjiid ođđahutkamiidda ja dáiddalaš duostilvuhtii, ja addit vejolašvuođa dutkat ja geahččaladdat iešguđet lágan filbmaformáhtaid.
– Dál barggan giehtačállosa ovdánáhttemin ja galggan gávdnat dáiddalaš ovttasbargoguimmiid. Leat olu ja somás barggut ovddasguvlui, go lean maid ráhkadeame dánsunjuoigan čájálmasa Davvi-Norgga riemuide geassemánus. In dieđe sullii ge goas filbma ilbmá kinoide, moattii jagi geahččen kánske, dadja Elle Sofe.
Eará filmmat maid MERFILM lea buvttadan Nye veier-ortnega olis lea earret eará DISCO, Jorunn Myklebust Syversen bokte, mii lea listejuvvon Norgga Oscar evttohussan.
