Dáiddadállu @ RidduRiđđu festivalá 2025
Dán jagi oassálastá Dáiddadállu Riddu Riđđu festiválas 2025, ja min dáiddárguoimmit leat gergosat ja viidát ovddastuvvon.
(Govva: Daniel Skog/ Riddu Riđđu)
Maŋimuš jagiid leat Dáiddadállu ja Riddu Riđđu, stuorámus sámi festivála ja Eurohpá stuorámus eamiálbmotfestivála, huksen lagas gaskavuođa ja ovttasbarggu sámi dáidaga prográmmeremis ja ovdanbuktimis. Dán jagi, nugo ovddit jagiid ge, ii leat dát gaskavuohta rievdan – baicca soaitá velá gievrrabut, go ásahuvvo sámi eksportakantuvra ja go geahččá festiválaprográmma.
Dán jagáš prográmmas mis leat guokte prográmmačuoggá, lassin dasa ahte oassálastit Riddu Riđđu jahkásaš delegáhtaprográmmas gos sii bovdejit oassálastiid miehtá máilmmi.
"Dan botta go vuorddašit soabadeami" - Susanne Hætta
Riddu Siiddas: juohke beaivvi – dii. 10.00 rájes
- Gáfestallan Susanne Hættain ja Dáiddadáluin, 10.7 - 12.7, dii 15.00 - 15.30
Installašuvdna «Dan botta go vuorddašit soabadeami» lea reakšuvdna Norgga duohtavuođa- ja soabahanprosessii mii orro bisánan. Soabaheapmái gáibiduvvo ahte guovttis dahje eambbosat soabahit, muhto dát installašuvdna fállá ovttaskas olbmuide jeđđejeaddji báikki. Dáppe sáhttá okto smiehtadišgoahtit iežas bákčasiid ja vásáhusaid birra, ja dáinna lágiin álggahit soabaheami.
Guolga lea guovddáš ávnnas dáidagis, ja govahallá sihke lieggasa, feminitehta, fuola ja muhtimin hástaleaddji elliidčálggu, seammás go sápmelaččaide lea bivdu ja boazodoallu guovddážis. Náhkit ja duoljit leat máŋga duhát jagi leamaš dehálaš sámi gálvvut ja guovddážis árktalaš eamiálbmogiid birgejumis.
Dáiddárguoibmi Susanna Hætta ráhkadii dán dáidaga Dáiddadálu 10-jagi ávvudeapmái, ja dat lea maiddái oassin ‘Birgejupmi Through Art’, mii gullá Horizon-prošektii, mas Dáiddadállu lea mielde.
Riddu Riđđui lea son rievdadan olggobeali «Dan botta go vuorddašit soabadeami» installašuvnnas, čalmmustahttin dihte ahte juohkehaš ferte soabadit dainna movt ieš dovdá ahte dáruiduhttin lea váikkuhan alcces.
Dorjon leat: Dáiddadállu, Bergesenstiftelsen ja Sámi dáiddáriid ja girječálliid buhtadusfoanda.
«Reconciliation. For atonement. Here is my care: Caring. About grief. I will comfort you: Comfort me. Comfort»
"Suoidnekaboom"
Kultursalen, duorastaga suoidnemánu 10 b., dii 12:00
Mo váikkuha guhkesáigge deaddu kompleaksa siskkáldas eanadahkii, iežas ja earáid ektui? Man muddui siskkáldas eallin eallá dássálaga olgguldas eallimiin, ja movt dát váikkuha olbmuid, gaskavuođaid ja servodaga?
“Suoidnekaboomas” deaivvadit bohccočoavjjit ja gámasuoinnit lávdedáidagiin ja ealli rupmašiiguin. Čájálmas guorahallá fysalaš ávdnasiid, ávdnasiid iešvuođalaš vejolašvuođaid ektui ja kultuvrralaš geavaheami ja konteavstta ektui.
Maŋŋá bovdejumi ráhkadit ođđa dáiddadahkosiid Dáiddadálu 10 jagi ávvudeapmái, lea Máret Ánne Sara bovden lávdedáiddáriid Anitta Katriina Suikkari ja Anja Saiva Bongo Bjørnstad, Alexandra Wingate ja Li Taiga muitalit ja dulkot muhtun oasi dain fysalaš materiálain ja dáidagiin maiguin Sara lea bargan maŋemus jagiid, erenoamážit temáhtalaš oktavuođain "Pile o'Sápmi" ja dáiddadahkosa ráidduin Venezia Biennalenii 2022.
"Suoidnekaboom" lea čájálmas mas ovttaskas dáiddalašvuohta ja iešguđet dáiddafágalaš suorggit, vásáhusat ja gelbbolašvuohta, deaivvadit friddjan.
Visuála dáidda ja dáiddalaš jođiheaddji: Máret Ánne Sara
Lihkastagat ja jietnamateriala: Anja Saiva Bongo Bjørnstad, Anitta Katriina Suikkari, Li Taiga, Alexandra Wingate ja Ánna-Kátri Helander
Lávddi alde: Anja Saiva Bongo Bjørnstad, Anitta Katriina Suikkari
Koreografiija ja buvttadeaddji: Alexandra Wingate
Assisteanta visuála dáidda: Li Taiga
Loga eanet Dáiddadálu 10 jagi ávvudeami birra dás.
(Govva: Fotograf Norvang)
