Son álggii čuojahit rumbbuid korpsas 8 jahkásažžan ja lei mielde rockejoavkkus nuoraidskuvllas. Musihkka šattai dehálaš oassi su eallimis go álggii musihkkaoahpu gazzat Manglerud joatkkaskuvllas 1986, ja dalle maid diđii mainna háliida joatkit viidásit eallimis. Maŋŋil guokte jagi Norgga jietnaskuvllas ja moanát jagiid musihkkárin ja teknihkkárin Osloves de Bernt Mikkel fárrii ruovttoluotta Guovdageidnui. Doppe son barggai Beaivváš nášunála teahteris ja álggahii skearrofitnodaga Rieban. Musihkka lea su eallin ja son bargá maid organistan Guovdageainnu ja Máze girkus.

Bernt Mikkel ja juoigit lea live-konseapta mas leat mielde árbevirolaš juoigit Mikkel Mathis Hætta, Johan Ivvar Gaup, Piera Eira ja Elen Marianne Utsi. Joavku lea čuojahan stuorámus sámi festiválain, nugo Ijahis Ijas, Beassášfestiválas Guovdageainnus ja Johkamohki márkaniin. Live konseapta lea oanehis áiggis leamaš mielde ealáskahttimin árbevirolaš juoigama, ja dahká luođi áigeguovdilin maiddái nuorat buolvvaide Sámis. Luohteskearrut, mas ođđaáidásaš musihkka ja árbevirolaš luohti deaivvadit, leat bures váldon vuoste. Bernt Mikkel lea buvttademiiguin guktii nominerejuvvon Sámi Music Awardas dán jagáš buvttadeaddjin, ja golbma jagi maŋŋálagai nominerejuvvon dán jagáš lávllan.

Dáiddadálu 10 jagi ávvudeami oktavuođas lea Bernt Mikkel šuoŋaid dahkan ja buvttadan konseartta fárrolaga juigiin ja dáiddárguimmiin Iŋgá Márjá Sarriin, man vuosttaš čájálmas lei Beassášfestiválas Guovdageainnus 2024.