Ann-Sofie Kallok
- 1980
- Hábmediddje & duodjár
- Guovdageaidnu
Ann-Sofie Kallok ráhkada erenoamáš buktagiid ođđaáigásaš hámiin. Son ráhkada buktagiid vuollegašvuođain ja vuđolaš duodjemáhtuin iešguđet vuogi mielde ja laktá sámi kultuvrra dujiide ođđa vugiin. Dáinna lágiin diktá árbevieru, máhtu, sielu ja váimmu gávdnat ođđa bálgáid ođđa oktavuođaide.
Son bajásšattai Stockholmma guovllus, ja joatkkaskuvlla maŋŋil máhcai iežas váimmuguovdu guvlui Johkamohkkái ja odne orru Guovdageainnus.
Oahpásmuva Ann-Sofie Kallokain dán filmmaža bokte.
ČSV bealječiŋat. Govvejeaddji: Johan Fredriksson
Ann-Sofie lea gazzan duodjeoahpu Sámi oahpahusguovddážis Johkamohkis, ja maiddái inšenevraoahpu, innovašuvdna ja hábmen čiekŋudemiin Gonagaslaš teknihkalaš allaskuvllas (KTH) Stockholmmas. 2022 rájes lea son leamaš stivralahttun Duojáriid ja dáiddáriid searvvis (DDS).
2023 lei son mielkuráhtor DDDDD - Duot Dát DD Dáidda čájáhusas, mii lei oassin Finnmárkku beanavuodjingilvvus Álttás, Guovdageainnus, Deanus, Girkonjárggas ja Kárášjogas. Čájáhus lea maid čájehuvvon Nuuk Nordic dáhpáhusas Kalaallit Nunaatas ja maiddái S.A.L.T dáhpáhusas Oslos.
Su silbačiŋat leat maid čájehuvvon Duojáriid ja dáiddáriid searvvi miellahttočájáhusas Gaaltjie guovddážis Staares.
Bealječiŋat. Govvejeaddji: Sara Vuolab
Ann-Sofies gerak oaivvis. Govvejeaddji: Johan Fredriksson
Beallječiŋat. Govvejeaddji: Johan Fredriksson
Suohpan giehtačikŋa. Govvejeaddji: Johan Fredriksson
2022:s oassálasttii son silbačiŋaidisguin Romssa duodje- ja fashionshowas Romssa ráđđeviesus, ja dasa lassin Duojáriid ja dáiddáriid searvvi miellahttočájáhusas Sámi duojis Johkamohkis ja maiddái Nihkkáluovtta Galleri Skáiddis.
Kallok oassálasttii maiddái duodječájáhusas Buoris Vaden Gerak! Sámi duoji lanjain Johkamohkis.
2014:s son oassálasttii riikkaidgaskasaš johttičájáhusas Fetish Modernity, mii lei boađus etnográfalaš museaid ovttasbarggus eurohpalaš prošeavttas «Ethnography Museums and World Cultures» (RIME). Čájáhus finai Madridas, Prahas, Wienas, Leidenis ja Stockholmmas.
«Duodji lea giehtabargu mii gáibida čehppodaga ja čanastaga gullevašvuhtii. Duodji čatná min vássán áigái, sohkii, olbmuide min birra ja doaibmá giellan sidjiide geat dan máhttet lohkat, mii muitala duojára dahje olbmo birra gii guoddá duoji.»
Árbevirolaš duojit leat ovdánan máŋggaid čuđiid jagiid dan hápmái maid odne oaidnit. Duodji lea maid kulturárbi mii čuovvu áiggi ja lea mielde hábmeme juohke sápmelačča persovnnalaš identitehta.
Čeabetčikŋa. Govvejeaddji: Ann-Sofie Kallok
Duddjodettiin. Govvejeaddji: Johan Fredriksson
2020:s čájehuvvui Nær bilder lásečájáhus Álttás. Ájtte musea Johkamohkis lea vuorkásis oastán máŋga silbačiŋa Kallokis. Dasa lassin ávkkástalai Finnmárkku fylkkagielda su dujiin Kulturforum Finnmark 2019 brandemis. Beaivváš Sámi Našunálateáhter Guovdageainnus geavahii 2017:s ges Kallok hábmen ránu lávdehábmemis čájáhusas Dá lean mun.
Juste dál Kallok bargá gelddolaš ovttasbargoprošeavttain mas galgá lávdečájáhus 2024 beassážiid.
Váldde oktavuođa Ann-Sofiin:
annsofie.kallok@gmail.com
Tel: +47 98668952