Dát filbma heive kulturberošteddjiide, studeanttaide, dáiddáriidda ja sidjiide geat beroštit inuihttakultuvrras ja álbmogis.

"The Forbidden Songs" lea performatiiva dokumentára mii govvida Ruonáeatnama sosiála, vuoiŋŋalaš ja dáiddalaš árbevieruid main lea guovddáš sadji rumbodánssas ja rumbolávlumis.

Filmmas lea vuosttažettiin sáhka ealáskahttit dán gildojuvvon árbevieru, ja čájehit man stuorra mearkkašupmi das lea dálá inuihtaid servodagas. Filbmadahkki etnográfalaš dutkamat ovttastahttojuvvon persovnnalaš muitalusaiguin, duddjo rikkis gova mii čájeha man nanus Ruonáeatnama árbi lea.

Hupmangiella filmmas lea ruonáeatnangiella, ja filbma lea tekstejuvvon eŋgelasgillii.

Maŋŋel čájeheami lea ságastallan. Filbmadahkki Varna Marianne Nielsen lea ieš Dáiddadálus, ja son áinnas muitala čiekŋaleappot kultuvrra ealáskahttima birra, movt koloniseren lea váikkuhan ja dan fámu man rumbodánsun ja -lávlun addá.

Dáiddadálu bealis illudit čájehit filmma ja sávvat ahte dis lea beroštupmi boahtit dan geahččat min luhtte.

Boađe fal don nai - dat lea áibbas nuvttá!