Adnon dávvirat ođđa dáidagin

Hilde áŋgiruššá luonddugáhttemii ja dainna lágiin mearridii geavahit adnon dávviriid mainna ráhkadii čájáhusa.

– Dálá servodat nuoskida nu ollu, ja go mun lean oassin servodagas mun dieđusge maid nuoskidan, muhto váruhan ahte in oaste nu olu diŋggaid ja geahččalan ahte eai báze ruskat mu maŋis. Mun anan árvvus adnon dávviriid, ja barggan dáidagiiguin mat govahallet min áiggi luonddugeavaheami. Dán áiggi ásahit bieggamilluid, ruvkkiid ja eará mat billistit min luonddu ja váriid. Ja mu mielas galggašeimmet buot váriid atnit bassin. Okta dáidda čájáhusas lea ge “Bassi várri”, mii lea ráhkaduvvon boares báiddiiguin maid lean gávdnan adnongálvogávppiin. Dáiguin ávdnasin lean čuohppat osiid mat ovttas hábmejit vári.

– “Magic carpet” lea namma dáidagis mii lea inspirerejuvvon dakkár noaide ránus mii girdá. Dáidda lea ráhkaduvvon guoros medisindoasain maid lean čoaggán iešguđet ásahusaiguin Finnmárkus. Dat hábmejit iešguđet minstariid. “Magic carpet” čájehuvvo nu ahte goappeš bealit dáidagis oidnoba, muitala Skancke Pedersen.

Ii leat gal mihkke glamour-eallin

Bargat dáiddariin lea arvat eambbo go dušše dáidagin bargat.

– Mu árgabeaivi dál korona-áiggi ii leat nu olu rievdan. Dábalaččat barggán ruovttus ákto. Lean lihkoš go beasan dáiddárin bargat, muhto ii leat gal mihkke glamour eallin. Lea mealgat olu hálddašeapmi maid mii dáiddarat fertet bargat go mis leat iežamet fitnodagat. Čállimat, eboastaid sáddedit duohkot deike, ohcamušat, gulahallan jnv. Stuora oassi bargoáiggis manná ge hálddašeapmai. Dál ovdal čájáhusráhpama šadda vel liige bargopressa. Ožžon luoikkas Beaivváža visti, vai mun ovttas iežan vehkiiguin sáhtán bargat daiguin stuorábuš dáidagiiguin doppe. Lean nu giitevaš go lean ožžon vehkiid čájáhussii, dadjá Hilde.

Máŋga jagi čoaggán ávdnasiid čájáhussii 

Hilde čilge movt su dáidagat riegádit. Ideat sáhttet fáhkkestaga boahtit, muhto lea hilljánis bargoproseassa mii sáhttá bistit máŋga jagi:

-Bargu lea hillján ja áddjái, ja váikkuha buot maid dagan. Lean máŋga jagi bargan eanaš dáidagiin mat leat dán čájáhusás. Lean plánen čájáhusa ávdnasiid bienastat bidnii, muhto in gal juohke dáidaga. Čájáhusas leat sihke čuvges ja sevdnjes fáttát. Okta čuvges dáidda gudnejahttá vuorrasit nissonolbmuid Guovdageainnus. Leat 8 gierddut ráhkaduvvon akvarellas, mat govahallet ahte dát nissonat leat ain jođus, still going strong ja sis leat ain olu fámut ja bargonávccat. Lea ivdnás dáidda mii lea áibbas eará go ovdamearkkadihte čájáhusa seavdnajit oasis.

– Geahčči mearrida dáidaga

– Mun láven dadjat ahte son guhte geahččá dáidaga, mearrida. Ii dárbbat álo ipmirdit dáidaga. Lea seammaládje go mii geahččat ovtta vári, eat mii nu jurddaš ipmirdit go dan vai eat, muhto mii geahččat dan ja váldit alccaseamet jurdagiid bokte mii addá juogalágan dovddu. Nie lea go dáidaga geahččá, čilge son.