– Lei nu somá neaktit Mor Marja. Son lea 90-95 jagi boaris, ja báddedettiin ledjen vuoidamis 3 diimmu juohke iđiida, muitala Anitta.

Movt ledjet oaidnit vuoidama maŋŋel?

– Lei hui suohtas oaidnit movt rivden maŋŋel vuoidama. Mun šadden badjel 30 jagi boarrásit. Lea unna, muhto deŧalaš rolla ja Mor Marja oidnogoahtá ráiddu loahpageahčen. In hálit nu olu muitalit dan birra, muhto sáhtán gal namuhit ahte mu rolla gohčoduvvui “Bilzis gamlemor fra Helvete” Lydogbilde.no filbmaárvvoštallamis.

Mii lea stuorámus erohus neaktit teateris ja kamera ovddabealde?

– Teateris lea dávja 8 vahkosaš geahččaladdan áigi vuosttaščájáhusa radjai. Álgá guorahallat ja geahččaladdat iešguđet áššiid ovttas bagadallin ja mielbargiiguin vai šaddá nu movt galgá. Oažžu dadjat ahte oahpasmuvva iežas rollain guhkit áiggi. Ja de galgá muitit nuppe hávvái jnv. Šaddá vurket áššiid čađatgaskka, ja leage hui buorre go dainna lágiin beassá čiekŋalit geahččaladdat, stoagadit ja návddašit rolla, dego karamella návddašit.

– Filmmas ges dáhpáhuvvojit áššit jođaneappo, šaddá leat spot on. Leat dieđusge rahkaneamit, muhto olmmoš lea eanet akto rahkanemiin. Bádden lea intensiiva, neavttárat gohččojuvvot das njuolga, ja dávjá gártet vuosttaš báddema buoremusán. Teateris fas galgá máŋgii geardduhit ovdal šaddá nu movt galga.

– Dovddán mun ráhkistan dan áiggi ovdal filbmabádden álgá, jaskatvuođa dovdat ja dan ahte leat dien máilmmis. Áiggi mielde go lean vuorasnuvvan ja vuovttat smarfegoahtán, lean álgán vel eambbo loaktit kamera ovddabealde leat. Mu mielas lea nu suohtas ja hástaleaddji bargat teaterin ja filbma-buvttademiiguin. Leat iešguđet bargovuogit seamma vuođus.

Movt lei neaktit “Velkommen til Utmark?” ráiddus?

– Mun liikon ráiddu fáttá. Mun ieš geasuhuvvon muitalit dahje neaktit dan mii ii leat perfekta. Olbmuin guhte leat buorit jurdagat, muhto soitet goitge eahpelihkostuvvat ja sii guhte čájehit iežaset heajos beliid. Lea váttis prošeakta leat buorre olmmoš. Mun doaivvun ráidu geasuha oallugiid. Leat lossa fáttát mat ovdanbuktojuvvot sevdnjes komediija ja drama bokte. Mun lean hui giitevaš go beasan bargat nu čeahpes, buorredahton ja siivos olbmuiguin buvttadeamis, earenoamožit bagadallin Dagur Kari ja vuoidin Asta Hafthorsdottir! Lei nu somá!

Don leat neaktan sihke filmmas/TVs ja teateris. Mii lea suohttaseamos?

– In sáhte vástidit. Leat iešguđet máilmmit ja mu mielas lea somá lonohallat muhtomin. Dovddan ahte lean lihkoš go mus lea vejolašvuohta nu bargat.

Oaidnit go du fas TVs fargga?

– Lean nu lihkoš ahte mun galggan dan dahkat. Justte dál lea buvttadeapmi “Catch and Release” nammasaš ráiddus Shuuto Arctic Arne Berggren ja Kristine Berg bokte. Lea seamma joavku geat ráhkadedje “Outlier” mainna dáiddárguoibmi Ken Are Bongo barggai. Lea hui miellegiddevaš ja somá bargat singuin.