Birgejupmi lea dutkanprošeakta mii bistá 3 jagi, man váldoulbmilat leat; dokumenteret ja revitaliseret eamiálbmotdieđu ja máhtu, árvvoštallat rievdadusaid dálkkádatheivehemiide ja iskat guovlluid transformatiiva potensiála. Dutkan galgá čađahuvvot erenoamážit Ráisavuonas, Loabágis, Álttás, Bearralvágis, Porsáŋggus, Várjjagis ja nuorta- ja mátta-Kalaallit Nunatas.

Oulu universitehta koordinere prošeavtta, mas leat oktiibuot 14 bargopáhka. Dáiddadállu jođiha ovtta bargopáhka, mii sisttisdoallá vuosttažettiin konferánssa lágideami, mii galgá čohkket sápmelaččaid ja eamiálbmogiid. Konferánssa ulbmil lea ráhkadit árenaid gos eamiálbmogat besset juogadit iežaset perspektiivvaid, áigeguovdilis áššiid ja juogadit dieđu ja máhtu. Konferánssa ulbmiljoavku leat dáiddárat, duojárat, árbediehttit ja akademihkkárat. Dáiddadálu bargopáhkkii gullá maid stuorát johttičájáhusa kurateren ja dáiddafágalaš oahppoovttadaga hábmen fárrolaga Sámi allaskuvllain.

Prošeavtta oppalaš ulbmil lea čalmmustahttit dálkkádatrievdadeami ja ruoná molsuma, mainna Dáiddadállu lea aktivvalaččat bargan ásaheami rájes. Dát fáttát leat dávjá guovddážis sámi- ja eamiálbmotdáidagis, ja čuohcá čielgasit ollu sápmelaččaid eallinvuohkái, máilmmioidnui ja árvovuđđui.

Prošeavttas leat earret eará dutkit UiTas, Oulu Universitehtas ja duiskkalaš dutkit ja maiddái sámi ja eamiálbmot partnerat, nugo Dáiddadállu, Sámiráđđi, Árvu AS, Álttá musea, psykologa Paarnaq, Helmholtz Zentrum Potsdam Deutsches Geoforschungszentrum, National Dong HWA University, Tartu Ulikool ja Ikitsivik.