Govva: CJ Utsi
Nils-Ove Kuorak
- 1994
- Juoigi
- Jiellevárri
Nils-Ove Kuorak lea juoigi ja duojár, riegádan ja bajásšaddan Jielleváris. Áhči bealde leat sihke davvi- ja julevmáttut, eatni bokte sus lea ges gullevašvuohta Guovdageidnui. Sus leat maiddái julev-máttut iežas áddjárohki bokte, nu ahte lea bajásgesson máŋgga guovllu sámi árbevieruiguin ja árbemahtuiguin.
Luohti lea álo leamaš sutnje hui divrras, ja son lea mánnávuođa rájes huraidan ieš. Bajásšaddan dakkár guovlluin gos luohti lea jávohuvvon, su mielas lea dehálaš nannet dán oasi sámi kultuvrras boahtteáigái.
«Dál go min sámi kultuvra, eallin ja eatnamat leat hearkkit lea mu mielas hui dehálaš čálmmustahttit ahte mii leat dás, ja ahte mii eat áiggo diktit nohkkot visot dan mii midjiide lea divrras.»
Su ipmi Máret Ristiinna lea leamaš stuora inspirašuvdnan ja rávvejeaddjin. Ipmi dat bivddii ge su vuosttaš geardde álmmolaččat juoigat Guovdageainnu beassášmárkaniin 2013:s. Nils-Ove ii leat álmmolaččat gullon fas ovdal go 2024 searvvai ja vuittii Sámi Grand Prix árbevirolaš juoiganoasi luđiin «Njeallječalmmát». Maŋŋel vuoittu lea son johtán oalle viidat sihke Sámis ja muđui Skandinavias, doallan konsearttaid ja unnit ovdánbuktimiid. Son lea maiddái doallan juoiganworkshopaid mánaide ja nuoraide gos hupma ollu dan birra movt son lea álgan juoigat ja maid son jurddaša luođi birra.
Nils-Ove lea almmuhan EP "Ealláš" miessemánu 1. beaivvi 2026. Dan son lea bargan ovttas sámi buvttadeddjiiin Axel Andersson Utsiin. Ovttas soai háliideaba hábmet live-konsearttaid gos čuovggat, govat ja eará reaiddut fállet gussiide konseartta mas lea stuorát vásahus go ieš dat musihkka.
«Dat mii mu musihkkain lea iežan mielas dehalaš, ja soaitá maiddái veahá erenoamáš, lea ahte buot čuojaheaddjit leat sápmelaččat. Ulbmil lea čájehit ja čalmmustahttit ahte sámi musihkka sáhttá oažžut fuomášumi máilmmeviidosaččat seamma bures go eará musihkka, ja ahte dan galget sihke sápmelaččat ja earát sahttit guldalit ja dovdat ahte dat čuohcá dovdduide.»
Go Jon Henrik Fjällgren bovdejuvvui guoimmuhit Sámi Grand Prix sáddagis 2025, de son bovdii Nils-Ove ja Mikkel Mathis Hætta juoigat su šuoŋas «Faamoen Vulie». Dát lea čuojahuvvon Spotifyas lagabui 300 000 geardde maŋŋel almmuheami.