Ánna-Katri Helander
- 1995
- Dánsejeaddji
- Guovdageaidnu
Ánna-Katri Helander lea riegádan ja bajásšaddan Guovdageainnus. Sus lea maid gullevašvuohta Detnui. Son dánsugođii orientálalaš vugiin 13 jahkásažžan, mii lei guhkit áiggi su váldo dáiddasuorgi. 16 jahkásažžan son orui jagi bearrašiinnis Aotearoas, gos oahpahallagođii Hip Hop dánsuma. Hiljážit rievdagođii su beroštupmi orientála dánsunvuogis Hip Hop vuohkái, ja dan rájes lea sámi kulturárbbi ja urbána dánsuma ovttastahttin leamaš oassin su identitehtas.
Oahpásmuva Ánna-Katri Helanderii dán filmmaža bokte.
Ánna-Katri lea ieš oahpahallan dánsuma bajásšattadettiin go ruovttubáikkis ii leat leamaš báljo makkárge dánsunbiras. 2016 čavčča son fárrii Osloi vázzit Flow Dance Akademiijas gos son lasi čiekŋudii Hip Hop ja urbána dánsunvuohkái.
Hip Hop dánsárin Sámis Ánna-Katri bargá dihto prinsihpaid mielde, nappo ahte galgá leat nanus, čeavlái ja ovdánit dađistaga. Sus lea lagas čanastupmi sámi kultuvrii ja Sápmái, muhto son seammás bargá urbána nuoraidkultuvrrain ja nu son lihkada guovtti máilmmi gaskka. Maŋemuš jagiid lea Ánna-Katri bargan frilánsárin Guovdageainnus ja bargá rájáidrasttildeaddji bargguiguin Sámis.
Govvejeaddji: Steve Nilsen
Govvejeaddji: Steve Nilsen
2017 šattai Ánna-Katri jagi nuorra dáiddárin álgoálbmot kulturfestiválas Riddu riđđus ja 2018 lei sus vuosttaš čájálmas iežas multimediála dánsunčájálmasain aindás, maid Riddu riđđu lei diŋgon. Čájálmasa son hábmii fárrolaga guvttiin haka dánsejeddjiin, máŋggain filbmadahkkiiguin ja dáiddáriiguin.
Ánna-Katri válddii fárrosis maori kultuvrra ja lavttii dan čájálmassii mii vuođđuduvvui njuoraidkultuvrii. Čájálmasa boađus lei hutkkás ovttasbargu golmmain dánsejeddjiin, internášunála dásis. Aindás čájálmas lei Ánna-Katri vuosttaš stuorra buvttadeapmi, mas bođii ovdan alla ámmátlaš dássi agis ektui. 2019 čájálmas jođii nuppes golmma vahkus sihke Sámis ja Oslos.
Govvejeaddji: Ørjan Marakatt Bertelsen
Govvejeaddji: Ørjan Marakatt Bertelsen
Anna Katri Helander. Govvejeaddji: Ørjan Marakatt Bertelsen
Koreográfiija
Hip Hop dánsejeaddji ja koreográfa álggahanáigodagas Sámis ja davvi Norggas lea Ánna-Katri olles ollu doaimmahit. Son lea earret eará koreográferen Charlie og sjokoladefabrikken čájálmasa Sámi mánáid teáhteris Deanus.
Maŋemuš jagiid lea Ánna-Katri maid leamašan dánsejeaddjin ja koreográfan sámi artistii AKKILii. 2019 beassážiid son koreográferii AKKILa konsearta čájálmasa Sámi Grand Prix allaárvosaš rahpandoaluin. Son lei maid koreográfan AKKILa álgokonsearttas Márkomeannu sámi festiválas 2018.