Dáiddadállui lea stuora gudni čájehit su dáidagiid 50 jagi maŋŋil, ávvučájáhussan seamma gilis. 

Kuráhtorat Elle Márjá Eira ja Leif Magne Tangen dat leaba fárrolaga Elle-Hánssain válljen dáidagiid mat leat šaddan čájáhussan «ČUOHTEBEALI DÁIDDÁR: 50 jagi – 50 dáidaga». 

Čájáhusa gávnnat njeallji báikkis Guovdageainnu márkanis; RDM Guovdageainnu gilišiljus, Duodjeinstituhtas, Čoarvemáddagis ja Diehtosiiddas (geahča kárttas dás vuolábealde).

Oassi dáidagiin ávvučájáhusas leat vižžojuvvon Árran julevsámi guovddážis, mii oaččui badjel 12.000 dávvira skeaŋkan Elle-Hánssas alddis. Dáiddadállu ja kuráhtorat giittet Árran julevsámi guovddáža go sii leat luoikan dáidagiid dán čájáhussii.

Dáiddadállu illuda čájehit unna oasáža su ollu dáidagiin Guovdageainnus, ja dat šaddá erenoamáš dáhpáhus, go Elle-Hánsa han deavdá 80 jagi geasset. Čájáhus ja riegádanbeaivi šaddet sutnje duppal ávvudeapmin dán jagi!

Bures boahtin!

Govva: Ørjan Marakatt Bertelsen