Elle Sofe Sara gearggus čájehit iežas vuosttaš guhkesfilmma Berlinas
Elle Sofe Sara čájeha iežas vuosttaš guhkesfilmma stuora ja dehálaš filbmafestiválas Berlinas – okta máilmmi deháleamos filbmafestiválain. Máilmmi premieara lea guovvamánu 16. beaivvi.
Sara Marielle Gaup Beaska ja Elle Sofe Sara Árru báddemiin.
Govva: Marie Louise Somby, Árvu
Stuora gudni
Elle Sofe Sara mielas lea stuora gudni ahte “Árru” čájehuvvo juste fal Berlin International Film Festivalas.
– Dát lea nu stuora dáhpáhus. Filbmamáilbmi lea nu hirbmat stuoris, ja gilvu beassat iežas filmmain dán festiválii lea garas. Lean nu rámis, ja in jáhke ahte lean vel ipmirdan maid dát duođai mearkkaša. Dat várra dovdo go joavddan Berlinii, dadjá Elle Sofe Sara.
Árru lea dat áidna davviriikalaš filbma mii gilvala ovcciin eará filmmain oažžut The Europa Cinemas Label Award. Geigejupmi lea lávvordaga 21.2 almmolaš bálkkašumiid geigejumis Grand Hyatt Berlinas.
Garra politihkalaš fáddá
Sátni árru muitala ahte juoga ráfehuhttá dahje lea hehttehussan. Filmma váldoolmmoš Maia viggá gáhttet iežas bearraša guohtuneatnamiid ruvkedoaimmaid vuostá. Su neavttaša Sara Marielle Gaup Beaska.
– Árru bokte čájehan man lossat ja váttis dat sáhttá leat eallit dakkár dilis ahte muhtumat báhkkejit du eatnamiidda, seammás go vásihat váttisvuođaid bearrašis. Maia bokte mun geahččalan čájehit movt son gieđahallá dán dili, ja ahte doaivva álo gávdno, dadjá Elle Sofe.
Árru filbmabargit
Govva: Dánil Røkke
Kreatiivvalaš ovttasbargu
Giehtačallosa lea Elle Sofe Sara čállán ovttas Johan Fastingain, guhte lea čállán rámiduvvon ráidduid nu go Makta ja Heimebane.
– Dát lea dehálaš internationála dohkkeheapmi Elle Sofe Saras, go son dál čájeha iežas vuosttaš guhkesfilmma ovtta máilmmi stuorámus filbmalávddiin. Ja dát lea mielde movttiidahttime olles sámi filbmamáilmmi, go dat čájeha ahte sámi filmmain lea lunddolaš sadji stuora filbmalávddiin, dadjá ISFI hoavda Anne Lajla Utsi neahttamagasiidnii Rushprint.
Čájehuvvo beaivválaččat festiválas
Árru čájehuvvo ge vuosttaš geardde guovvamánu 16. beaivvi, ja dasto čájehuvvo beaivválaččat guovvamánu 22. beaivvi rádjái.
Neavttárat leat Sara Marielle Gaup Beaska, Ayla Gáren Nutti, Mikkel Gaup, Simon Issát Marainen, Ellen Anne Buljo Stabursvik ja Anni-Kristiina Juuso.
Árru
Govva: Dánil Røkke
Dáiddalaš lokten
Guhkesfilbma Árru lea Elle Sofe Sara nubbi stuorra prošeakta oanehis áiggis. Skábmamánus diibmá čájehuvvui su baleahtta Láhppon / Lost, mii lea vuosttaš sámi luohte- ja baleahtta čájálmas Opera váldolávddis.
Dán filmmas lea maiddái luohti ja dánsun. Oktiibuot 13 dánsejeaddji oidnojit dain dieđuin maid Elle Sofe Company lea almmuhan iežas neahttasiiddus. Jus logat eanet Árru birra doppe, de oainnát ahte earret eará Norgga filbmainstituhtta ja Sámediggi leat ruhtadan filmma.
Dáiddadállui lea maid stuorra gudni go Elle Sofe Sara, gii lei mielde ásaheamen dán dáiddárfierpmádaga, lea lihkostuvvan iežas prošeavttaiguin. Dát duođašta ahte fierpmádaga ásaheapmi lea leamaš ávkin sámi dáidaga ja dáiddáriid ovddideamis miehtá máilmmi.
