Sámi dáiddár čiŋaha Norgga ođđa ráđđehusvistti bassi váriin
Dáiddárguoibmi Hilde Skancke Pedersen lea bargame dáidagiin «Bassi várri, giđđadálvi – Hellig fjell, vårvinter», mii govvida vári Norgga bealde Sámis. Dáidda galgá leat D-blohkas ođđa ráđđehusgoartilis.
Dáidda čájeha várreguovllu mii lea guhkkin eret Norgga oaivegávpogis ja ráđđehusvisttis. Muhto dáidagis lea čielga diehtu politihkkariidda ja byrokráhtaide geat galget bargatođđa visttiin:
– Mu dáidda čuoččuha ahte buot várit leat basit, buot luondu lea bassi, dadjá Hilde Skancke Pedersen iežas dáidaga birra mainna bargá Guovdageainnus.
Skancke Pedersen atná gollán seaŋgagávnniid ja t-báiddiid iežas dáidagii, ja daid lea son oastán adnongálvomárkaniin. Dáid son lea válljen ávnnasin deattuhan dihte dan maid háliida gaskustit dáidagiinnis:
– Eana ii gierdda ahte dan ávkkástallá badjelmeare. Galgat go mii olbmot ain ávkkástallat das, ja duššái golahit dan jurddetkeahttá ja dárbbašmeahttun sođiide? Dáidda mii čájeha giđđadálvvi vári Finnmárkkus sáhttá boktit doaivaga, ja čájehit ahte áiggit čuvggodit.
Olles guovlu masa huksejit ođđa ráđđehusgoartila galgá leat gárvvis 2026, ja dohko leat válljen guokte sámi dáiddára bargguid, namalassii Hilde Skancke Pedersen ja Outi Pieski.
Govat: Per Heimly/Dáiddadállu
- Hilde Skancke Pedersen (r. 1953, Hámmerfeasttas) ássá ja bargá Guovdageainnus, ja lea oidnosis dehálaš dáiddárin sihke dáčča ja sámi dáiddabirrasis.
- Son lea dáiddár, kuráhtor, dramatihkkár ja lávde- ja bivttashábmejeaddji, ja son lea ráhkadan máŋga dáidaga mat leat almmolašvuođas sihke Sámis ja Norggas. Okta dain mii dávjjimusat oidno, lea su dáidda «Luottat - Spor» mii lea seaidnemálagovva Sámedikki dievasčoahkkinlanjas.
- Pedersen lea Sámi dáiddaguovddáža stivrrajođiheaddji 2022 – 2027. Sus lea oahppu Statens håndverks- og kunstindustriskole (SHKS, dál Kunsthøgskulen KHiO), Oslos (1974 – 78) ja lea vázzán Girječállinoahpu (Forfatterstudiet) UiT Norgga árkatalaš universitehtas, Romssas.
