Máilmmebeakkán Tate Modern ja Hyundai Motor almmuhit odne ahte Máret Ánne Sara dat lea boahtte dáiddár dan hirbmat stuora čájáhuslanjas mas lea namma “Turbinehall”, seammás go čielggai ahte Hyundai Motor viiddida ovttasbarggu gitta 2036 rádjái.

Turbinehall lea leamaš čájáhusbáikin 25 jagi, ja dáiddár ieš dadjá ahte dát lea erenoamáš sutnje:

– Dát lea nu stuoris ahte mun in riekta ipmir masa lean iežan lohpidan dahje sehkkehan, dadjá Máret Ánne Sara movttegis jienain.

Sara dadjá ahte Turbine Hall lea nu issoras stuora latnja dakkar sturrodagas mas ii leat goasse ovdal bargan. Dat mielddisbuktá ođđa bargovugiid sutnje. Eanet ii sáhte muitalit vel dál, dadjá dáiddár.

Turbine Hall lea 26 mehtera allat ja 3,300 m2 stuoris. 60 miljon geahčči leat galledan dán, dan rájes go rahppui 2000:s.

Karin Hindsbo, Tate Modern direktevra cealká: “Máret Ánne Sara lea okta dain čeahpes dáiddáriin sámi dáiddárjoavkkus geat maŋimuš jagiid leat ožžon viiddis riikkaidgaskasaš fuomášumi go leat dahkan oidnosii Sámi ja sápmelaččaid gullevaš áššiid. Go Sara čalmmustahttá iežas servodaga stuorra sosiála, ekologalaš ja politihkalaš fuollaáššiid, de sávvá son lasihit beroštumi ja diđolašvuođa, ja maiddái duohta rievdadusaid. Mun lean ilus go son ráhkada iežas vuosttaš barggu Stuorra-Británnias dáppe Tate Modern:as ja illudan oaidnit mo son rievdada Turbine Halla. Mun lean sihkar ahte dat šaddá sihke hástaleaddjin ja imaštahttin.”

Máret Ánne Sara čájáhus lea rabas álbmogii golggotmánu 14. beaivvi 2025 rájes gitta cuoŋománu 6. beaivái 2026.

Govva: Per Heimly / DD

Loga dás maid Tate čállá iežas Facebook-siiddus: https://www.facebook.com/100064898883494/posts/1036932828480004/?rdid=rtPqn3s6mffFpXDG#