– Mun lean nu giitevaš go Goavve-Geabbil (Hyundai Commission), mii lea hábmejuvvon ovttas hádja-dahkkiin Nadjib Achaibou:in, lea ožžon dán jagi Sadakichi Award eksperimentála hádja-barggus, man The Art and Olfaction Awards juohká.

Dan dadjá dáiddár Máret Ánne Sara maŋŋel go čielggai ahte su dáidaga hádja dat vuittii dán bálkkašumi.

– Hádja lea dehálaš mu dáiddalaš barggus, danne go munnje lea dat sierra giella. Ipmirdit hájaid lea dego geaidnu sámi filosofiijai ja máilmmeipmárdussii. Hádja lea čadnon gapmui, ahte rumaš ja energiijat gulahallet, dadjá Máret Ánne.

• The Art and Olfaction Awards lea geigejuvvon 2014 rájes.
• Bálkkašumis leat moadde luohká, ja hádja dáiddalaš barggus lea okta dain luohkáin.

Máret Ánne dáidagiin leat daid maŋemus jagiid leamaš hájat guovddážis. Sihke Veneziabiennales ja Tate Modern museas lea hádja leamaš sierra vásáhussan, dehálaš oassi mii addá čiekŋalis ja ollislaš dáiddavásáhusa geahččái.

Nadjib Achaibou lea bargan suinna sihke Venezias ja Londonis.

– Mun lean nu ilus ja giitevaš go lean beassan Nadjib Achaibou:in bargat. Son lea erenoamáš hádjadahkki - parfymøra, ja su čehppodat, máhttu, kreativitehta ja áŋgirvuohta lea leamaš nu dehálaš dán barggus, dadjá Máret Ánne Sara.